3 თებერვალს ევროპის საბჭოს გენერალურმა მდივანმა, ალენ ბერსემ, ტელეფონით ისაუბრა საქართველოს პრემიერ-მინისტრთან, ირაკლი კობახიძესთან საერთო სამუშაო ჯგუფის შექმნასთან დაკავშირებით. სამუშაო ჯგუფს  ე.წ. „უცხოური გავლენის“ კანონში ცვლილებების შესატანად უნდა ემუშავა. სამუშაო კოლეგიის შექმნის გადაწყვეტილება მყარი შეთანხმებით იქნა მიღებული ევროპის საბჭოს გენერალური მდივნის 2024 წლის 20 დეკემბრის თბილისში ვიზიტის დროს. 20 იანვარს მდივნმა წარადგინა წერილი და ოფიციალურად მოითხოვა სამუშაო ჯგუფის შექმნა. ეს მოთხოვნა უპასუხოდ დარჩა.

სატელეფონო საუბრისას, პრემიერ-მინისტრმა განაცხადა, რომ „შეცვლილი პირობების“ გამო, მისი მთავრობა აღარ გეგმავს მონაწილეობას საერთო სამუშაო ჯგუფში ან „უცხოური გავლენის“ კანონში შესატანი ცვლილებების განხილვას, როგორც ადრე იყო შეთანხმებული. თუმცა, მან დაადასტურა საქართველოს მზადყოფნა გაგრძელდეს თანამშრომლობა ევროპის საბჭოსთან ინტერპარტიული თანამშრომლობის ფარგლებში.

გენერალურმა მდივანმა დიდი მღელვარებით შეაფასა საქართველოს ხელისუფლების გადაწყვეტილება. მან ასევე გამოთქვა შეშფოთება საქართველოში სამართლისა და ადამიანის უფლებების მდგომარეობასთან დაკავშირებით, აგრეთვე პოლიტიკური პოლარიზაციის გამო. ამჟამად შეფასება მოხდება ახალი ვითარების შესაბამისად,  მთავრობის მიერ შეცვლილი კურსის გამო, დიალოგი საქართველოს ხელისუფლებასთან გრძელდება.

მოგვიანებით ევროპის საბჭოს განცხადებას პრემიერ-მინისტრი ირაკლი კობახიძე გამოეხმაურა. ჟურნალისტებთან საუბრისას მან განმარტა გადაწყვეტილების მიზეზი:

„თქვენ გახსოვთ, ბატონი ბერსე ჩამობრძანდა საქართველოში, რასაც მოჰყვა ძალიან უხეში შეფასებები რადიკალური ოპოზიციის მხრიდან, შეურაცხმყოფელი შეფასებებიც კი – ეს არის კონტექსტი. ჩვენ გვქონდა საუბარი იმასთან დაკავშირებით, რომ შეიქმნებოდა სამუშაო ფორმატი გამჭვირვალობის შესახებ კანონის გადასამუშავებლად, თუმცა განვითარებული მოვლენების ფონზე ამ ფორმატმა, რა თქმა უნდა, დაკარგა თავისი პირვანდელი მნიშვნელობა.

ჩვენ გადავდგით კონკრეტული ნაბიჯი, თუმცა ნაცვლად იმისა, რომ შემხვედრი ნაბიჯი გვეხილა კონკრეტული სუბიექტების მხრიდან, „დიფ სთეითის“ და სხვა შესაბამისი სტრუქტურების მხრიდან, პირიქით, საპირისპირო ტენდენცია ვიხილეთ – გაგრძელდა რევოლუციის მოწყობის მცდელობა, თქვენ ხედავთ, რომ ოთხი ასეული ადამიანი ყოველდღე უყენიათ რუსთაველის გამზირზე, აკეტვინებენ რუსთაველის გამზირს – ანუ არავითარი შემხვედრი ნაბიჯი. გაგრძელდა სანქციების დაწესება, PACE-დანაც იცით, რა გადაწყვეტილება იქნა მიღებული ევროსაბჭოს საპარლამენტო ასამბლეიდან, როდესაც დათქმებით მიანიჭეს ჩვენ დელეგაციას მხოლოდ სტატუსი. რა თქმა უნდა, ეს ყველაფერი არ ტოვებს იმის სივრცეს, რომ ჩვენ ვისაუბროთ გამჭვირვალობის შესახებ კანონის გარშემო ფორმატის შექმნაზე. ამ ყველაფრის ფონზე, არათუ არ შეიძლება დარბილდეს გამჭვირვალობის კანონი, ოღონდ არ ვიცი, მეტი რა უნდა დარბილდეს იმიტომ, რომ საუბარია ამ კანონში მხოლოდ ერთჯერად, ყოველწლიურ ფინანსურ დეკლარაციაზე – ამ ყველაფრის ფონზე, როდესაც უცხოური დაფინანსებით მოქმედი NGO-ები გამოიყენებიან, როგორც რევოლუციის მოწყობის მცდელობის მთავარი ინსტრუმენტი, გამჭვირვალობის შესახებ კანონის დარბილებაზე საუბარი ზედმეტია და ასევე, გაუმჭვირვალობის შესახებ სამუშაო ფორმატის შექმნაზე საუბარი არის ზედმეტი. შესაბამისად, ჩვენ ეს პოზიცია გავაცანით ბატონ ბერსეს. ჩვენ, ყველა პრინციპი, წესი დავიცავით. წინასწარ ვაცნობეთ ბატონ ბერსეს იმასთან დაკავშირებით, რომ ამ ფორმატმა ამოწურა საკუთარი დატვირთვა“, -განაცხადა ირაკლი კობახიძემ.

ევროპის საბჭოს განცხადებას ორგანიზაციის პრესსამსახური ავრცელებს.