ეგზიტპოლის შედეგების მიხედვით, გერმანიის ვადამდელ ფედერალურ არჩევნებში ფრიდრიხ მერცის ქრისტიან-დემოკრატების პარტიამ გაიმარჯვა და ხმების 29% აიღო, ხოლო ულტრამემარჯვენე პარტია ალტერნატივა გერმანიისთვის (AfD) მეორე ადგილზე გავიდა ხმების 19.5%-ით.

დოიჩე ველეს ინფორმაციით, ამ მონაცემებით პოტენციური სამთავრობო კოალიციის შექმნა ქრისტიან-დემოკრატებს სოციალ-დემოკრატების პარტიასთან შეუძლია, რომელმაც არჩევნებში 16% აიღო.

აღსანიშნავია, რომ  ‘’ალტერნატივა გერმანიისთვის’’ მიერ აღებული შედეგები საუკეთესო მაჩვენებელია წინა წლების ეროვნულ არჩევნებზე აღებულ შედეგებთან შედარებით და 2021 წელთან შედარებით პარტიის შედეგი 9.1%-ით არის გაუმჯობესებული.

მნიშვნელოვანია, რაც შეიძლება მალე ჩამოვაყალიბოთ მთავრობა, – ამის შესახებ კონსერვატიული ბლოკის – ქრისტიან-დემოკრატიული კავშირი/ქრისტიან-სოციალური კავშირის  ლიდერმა ფრიდრიხ მერცმა პარტიის ოფისში სიტყვით გამოსვლისას განაცხადა.

მან ისაუბრა “შესანიშნავ საარჩევნო კამპანიაზე” და „პოლიტიკური ოპონენტების პატივისცემაზე”.

„ახლა ჩვენ ერთად ვისაუბრებთ და მნიშვნელოვანია, რაც შეიძლება მალე ჩამოვაყალიბოთ მთავრობა… დანარჩენი მსოფლიო არ გველოდება.

მსოფლიოში ყველა დაინახავს, რომ გერმანიას ჰყავს სანდო მთავრობა“, – განაცხადა მან და დასძინა: „დღეს საღამოს ვიზეიმებთ და ხვალიდან განვაახლებთ მუშაობას“.

ამასთანავე,როგორც ფრიდრიხ მერცმა აღნიშნა,მისი მთავარი პრიორიტეტია ევროპის რაც შეიძლება სწრაფად გაძლიერება,რათა დამოუკიდებლები იყვნენ ამერიკის შეერთებული შტატებისგან თავდაცვის სფეროში.