საფრანგეთის ლიდერმა აშშ-ს პრეზიდენტ დონალდ ტრამპთან შეხვედრის შემდეგ განაცხადა, რომ რუსეთთან ცეცხლის შეწყვეტა შესაძლებელია, თუმცა მას უნდა ჰქონდეს უსაფრთხოების გარანტიები.
ვაშინგტონში აშშ-ის პრეზიდენტ დონალდ ტრამპთან მოლაპარაკების შემდეგ, Fox News-თან ინტერვიუში პრეზიდენტმა ემანუელ მაკრონმა აღნიშნა, რომ შესაძლებელია ვარაუდის გამოთქმა რუსეთ- უკრაინის ზავზე უახლოეს კვირებში. მანვე დაამატა, რომ ლიდერები – მათ შორის ტრამპი ფრთხილად უნდა იყვნენ რუსეთთან მოლაპარაკებებში.
„2014 წელს ჩვენ მივაღწიეთ ცეცხლის შეწყვეტას რუსეთთან… თუმცა ის ყოველ ჯერზე ირღვეოდა“, – თქვა მაკრონმა და დასძინა, რომ რუსეთის პრეზიდენტ ვლადიმერ პუტინთან ნებისმიერი ზავის შეთანხმება უნდა იყოს მხარდაჭერილი უსაფრთხოების მყარი გარანტიებით.
ემანუელ მაკრონთან ერთობლივი პრესკონფერენციის დროს კი დონალდ ტრამპმა აღნიშნა, რომ პუტინი დათანხმდა ევროპული სამშვიდობო ძალების არსებობას უკრაინაში, მიუხედავად იმისა, რომ რუსეთის ელჩმა გაერთიანებულ სამეფოში, ანდრეი კელინმა რამდენიმე დღით ადრე პირდაპირ უარყო მოლაპარაკების ეს პუნქტი. ტრამპმა განაცხადა, რომ რუსეთსა და უკრაინას შორის ომი შეიძლება დასრულდეს რამდენიმე კვირის ვადაში, თუმცა ევროპამ უნდა იტვირთოს სამშვიდობო შეთანხმების მიღწევის საკითხი.
მაკრონის თქმით მოლაპარაკებები ბრძოლის დასრულებაზე უნდა მოიცავდეს უსაფრთხოების გარანტიებს, მიწას და ტერიტორიებს.
საპირისპიროდ ტრამპს არ უხსენებია უსაფრთხოების გარანტიები შეხვედრის შემდეგ, თუმცა აღნიშნა, რომ უკრაინაში მშვიდობის უზრუნველყოფის ღირებულება ევროპამ და აშშ-მაც უნდა დაფაროს.