გურიის რეგიონში რამდენიმე სოფელი ამ დრომდე გარე სამყაროსაა მოწყვეტილი. ჩოხატაურის მუნიციპალიტეტს საკრებულოს ოპოზიციონერი წევრის ბაჩო ახალაძის ინფორმაციით, მოსახლეობას არ მიეწოდება ელექტროენერგია და არის საკვების დეფიციტის პრობლემაც.
„ჩოხატაურის მუნიციპალიტეტში კვლავ რთული მდგომარეობაა. რამდენიმე სოფლის გზა ცენტრამდე გაიწმინდა. შიდა სასოფლო გზები არსად არის გაწმენდილი. თოვლის საფარმა წუხელ კიდევ მოიმატა, მაგრამ დიდად არა. ყველაზე რთული ზონა არის საჭამიასერი, ქვემო ხეთი, ზემო ხეთი, კოხნარი ეს სოფლები მოწყვეტილია გარე სამყაროს. ელექტროენერგია არ არის. ვიცით რამდენიმე მარტოხელა მოხუცი, რომელიც საერთოდ კონტაქტზე არ გამოდის, როგორ არიან არც ვიცით და მათ შესახებ ინფორმაცია არ გვაქვს. გარდა ამისა არის საკვების პრობლემაც. ხელისუფლებას მოვუწოდებ მოქმედებისკენ, რათა არსებული პრობლემები დროული მოგვარდეს,“- განაცხადა ბაჩო ახალაძემ.
ჩოხატაურის მერიის ინფორმაციით, სტიქიის შედეგების სალიკვიდაციო სამუშაოებში დაზარალებული მოსახლეობის დასახმარებლად ჩართულია თავდაცვის ძალები.
„მუნიციპალიტეტში მობილიზებულია დამატებითი ტექნიკა, რომელიც მთელი ღამის განმავლობაში ყველა მიმართულებით წმენდდა ცენტრალურ გზებს. გზის გაწმენდის სამუშაოები ინტენსიურად გრძელდება”, – აცხადებენ ჩოხატაურის მერიაში.
ოზურგეთის მუნიციპალიტეტის სოფლებში მოსახლეობა დახმარებას ითხოვს. მათი განცხადებით, სოფლებში ბავშვები და მოხუცები არიან ჩარჩენილი, რომლებსაც პირველადი აუცილებელი ნივთები ესაჭიროებათ.
მოსახლეობა ადგილობრივ მთავრობას მიმართავს.
„საცხოვრებელი სახლები ინგრევა, ავარიულ სახლებს უფრო მეტად შეექმნათ პრობლემები. სოფლებში მოხუცებს დახმარება სჭირდებათ. თოვლის მასა საფრთხეს ქმნის”, – ამბობენ ადგილობრივები.
ოზურგეთის მერიაში აცხადებენ, რომ ადმინისტრაციული ერთეულების მიმართულებით გაწმენდითი სამუშაოები ინტენსიურად მიმდინარეობს.
ოზურგეთის მერიის ცნობით, სოფელ ჯუმათში თოვლში ჩარჩენილი მცირეწლოვანი და მისი ოჯახი სტიქიის ზონიდან სამაშველო სამსახურის წარმომადგენლებმა უვნებლად გამოიყვანეს.