საბერძნეთში სატრანსპორტო მოძრაობა პარალიზებულია. ამის მიზეია  ტრანსპორტის თანამშრომლების მასშტაბური გაფიცვა.დემონსტრანტები აცხადებენ, რომ  გაფიცვა 24-საათიანია და ის ორი წლის წინ ტემპაში მომხდარ სარკინიგზო კატასტროფას უკავშირდება.

დღის განმავლობაში შეჩერებული იქნება სარკინიგზო მოძრაობა. ათენში მეტრო და ტრამვაი მხოლოდ 09:00-დან 17:00 საათამდე იმუშავებს. გაფიცვას შეუერთდნენ ტაქსის მძღოლებიც.

საპროტესტო აქცია პოლიციასთან შეტაკებაში გადაიზარდა. მედიის ინფორმაციით, ათენის ცენტრში დაპირისპირება მას შემდეგ დაიწყო, რაც არაიდენტიფიცერული პირების ჯგუფმა დაიწყო ბენზინისგან დამზადებული ასაფეთქებლების სროლა პარლამენტის ეზოში განთავსებული პოლიციის სპეცრაზმის მიმართულებით. პოლიციამ საპასუხოდ ცრემლსადენი გაზი გამოიყენა.

შეტაკება, რომელიც თავდაპირველად შემოიფარგლებოდა სინტაგმის მოედნის ერთ კუთხეში, რამდენიმე წუთში მიმდებარე ქუჩებში გავრცელდა. დაპირისპირების შედეგად სინტაგმის მოედანზე რამდენიმე მომიტინგემ გონება დაკარგა, ზოგს კი რესპირატორული პრობლემების გამო მკურნალობდნენ შემთხვევის ადგილზე. როგორც მედია წერს, რამდენიმე ადამიანი საავადმყოფოში გადაიყვანეს.

შეგახსენებთ, რომ 2023 წლის თებერვალში საქალაქთაშორისო სამგზავრო მატარებელი, რომელიც ათენიდან ჩრდილოეთ ქალაქ თესალონიკში ასრულებდა რეისს, ქალაქ ლარისასთან სატვირთო მატარებელს შეეჯახა. შედეგად, 57 ადამიანი დაიღუპა, ძირითადად სტუდენტები.

უბედურ შემთხვევას მთელი ქვეყნის მასშტაბით საპროტესტო აქციები მოჰყვა, სადაც 65 000-ზე მეტი ადამიანი პრემიერ-მინისტრ კირიაკოს მიცოტაკისის გადადგომას ითხოვდა.