გამოცემა Bloomberg-ის ინფორმაციით, ულტრამემარჯვენე და პრორუსული განწყობების მქონე პოლიტიკოსს კალინ ჯორჯესკუს მაისში დაგეგმილ საპრეზიდენტო არჩევნებში მონაწილეობა აეკრძალა.

ბუქარესტის საარჩევნო ბიუროს სპიკერმა 9 მარტს განაცხადა, რომ ჯორჯესკუს კანდიდატურა ბათილად არის ცნობილი. ბიურომ ჯორჯესკუს კანდიდატურასთან დაკავშირებით 1 000-ზე მეტი სარჩელი მიიღო, რაც ძირითადად მის ანტიდემოკრატიულ და ექსტრემისტულ პოზიციებს ეხებოდა. ბიუროს გადაწყვეტილების გასაჩივრება ახლა საკონსტიტუციო სასამართლოში შეიძლება.

გადაწყვეტილებას ჯორჯესკუს ათეულობით მხარდამჭერის  ცენტრალურ საარჩევნო კომისიასთან შეკრება მოყვა. მათ   უსაფრთხოების კორდონის გარღვევაც სცადეს, თუმცა უშედეგოდ.

ბიუროს გადაწყვეტილებას მალევე ჯორჯესკუ X-ზე გამოეხმაურა და დაწერა, რომ რუმინეთი ტირანიული მმართველობის ქვეშ იმყოფება.

“პირდაპირ გულში დარტყმა მსოფლიოში დემოკრატიისთვის! ერთი გზავნილი დამრჩა! თუ რუმინეთში დამარცხდება, მთელი დემოკრატიული მსოფლიო დაეცემა! ეს მხოლოდ დასაწყისია, ეს ასე მარტივია!

ევროპა ახლა დიქტატურაა, რუმინეთი ტირანიის ქვეშ იმყოფება!” – დაწერა ჯორჯესკუმ.

ჯორჯესკუმ განმეორებითი საპრეზიდენტო არჩევნებისთვის თავისი კანდიდატურა პარასკევს, 7 მარტს შეიტანა, მაგრამ უკვე არსებობდა ეჭვი, რომ მას კენჭისყრის უფლებას არ მისცემდნენ.

რუმინეთის სასამართლოს უმაღლესმა ინსტანციამ საპრეზიდენტო არჩევნების პირველი ტურის შედეგები დეკემბერში, მეორე ტურის ჩატარებამდე ორი დღით ადრე გააუქმა, მიზეზად კი არჩევნებში ჯორჯესკუს სასარგებლოდ რუსეთის ჩარევა დაასახელა.

ნოემბერში გამართულ აწ უკვე გაუქმებულ პირველ ტურში ჯორჯესკუ მოულოდნელად პირველ ადგილზე გავიდა და მეორე ტურში პროევროპელ კანდიდატს, ელენა ლასკონის, უნდა დაჰპირისპირებოდა.

კალინ ჯორჯესკუს მიმართ ამჟამად სისხლის სამართლის ექვსი საქმე მიმდინარეობს, მათ შორის ლაპარაკია ფაშისტური ორგანიზაციის წევრობაზე და კამპანიის დაფინანსების შესახებ არასწორი ინფორმაციის მიწოდებაზე. ის ყველა ბრალდებას უარყოფს.