„კიდევ ერთხელ დადასტურდა, რომ სამწუხაროდ, სასამართლო გადაიქცა პროკურატურის მიერ მოთხოვნის ნოტარიულად დადასტურების უწყებად. ჯერ ერთი, ეს კომისია თავისთავად არალეგიტიმურ პარლამენტში არის შექმნილი, მაგრამ გარდა ამისა, კანონის მოთხოვნის დარღვევით არის შექმნილი, რომელიც რომელიც აწესებს,რომ კომისიის წევრთა ოდენობის 50%-ზე ნაკლები არ უნდა იყოს ოპოზიციის წევრი. პოლიტიკური თაღლითობაა საუბარი იმაზე,რომ თითქოს ეს საგამოძიებო კომისია ოპოზიციისგან შედგება. იმ ადამიანებს, რომლებიც „ქართული ოცნების“ სიით გავიდნენ, ერთი კრიტიკული სიტყვა არასდროს უთქვამთ, არც „ქართულ ოცნებაზე“ და როგორ შეიძლება ეს იყოს ოპოზიცია. მეორე – გახარიას პარტიამ თქვა, რომ ამ ე.წ. კომისიის მუშაობაში მონაწილეობას არ აპირებს იმიტომ, რომ მას არალეგიტიმურად მიიჩნევს. შესაბამისად, კანონის უხეში დარღვევაა, როდესაც ეს კომისია თავის თავს საგამოძიებო კომისიას უწოდებს. ეს არის ერთპარტიული დაჯგუფება, რომელიც ცდილობს გამოიყენოს ვითომდა საგამოძიებო კომისიის პლატფორმა ოპონენტების გასაშავებლად, გასალანძღად, დისკრედიტაციისთვის და ანგარიშსწორებისთვის. აი, ეს არის, ეს ვითომდა საგამოძიებო კომისია.

რაც შეეხება მიმალვას, მე ამაზე მოსამართლეს ვუთხარი, რომ 1990-1992 წლებში, როდესაც უზენაესი საბჭოს წევრი ვიყავი, გადატრიალების შემდგომ, სიცოცხლის მოსპობის რისკის მიუხედავად არ წავსულვარ ამ ქვეყნიდან. შემდგომ, როდესაც ბიძინა ივანიშვილის მხრიდან დაიწყო დევნა და 9-წლიანი მუხლი მომიყენეს მაშინაც არ წავსულვარ ამ ქვეყნიდან და არსად ვაპირებ წასვლას! შესაბამისად, ვითომდაც რომ მიმალვის რისკი არსებობდა, სიცრუეა. ამიტომ, ცხადია, რომ ჩვენ არ ვეთანხმებით ამ გირაოს გამოყენებას და ეს გადაწყვეტილება გასაჩივრდება“, -განაცხადა ბადრი ჯაფარიძემ.