„ქართულ ოცნებას“ ამ კომისიით უნდა, რომ ვაღიაროთ ხელისუფლება, ამაზე კი მარტივი პასუხი გვაქვს – არ მოვალთ და არ გაღიარებთ, რადგან თქვენ არალეგიტიმური პარლამენტი და კომისია ხართ.

ბოლო 5 წლის პოლიტიკური შეტევის განხორციელების შედეგად, ბიძინა ივანიშვილმა დაინახა, რომ ვერ შეგვაშინა, ვერ გაგვიშვა პოლიტიკური სცენიდან, პირიქით უფრო გავძლიერდით. ვერც ციხით დაგვაშინებს და ვერც ვერაფერს ვერ გვიზამს. მის ამ ქმედებებზე პასუხი მარტივია, მისი მთავრობა ანტიქართულია, რომელიც არ ემსახურება ქართველი ხალხის კონსტიტუციით გაცხადებულ არჩევანს – ევროინტეგრაციას – და ყველაფერს აკეთებს, რომ საქართველო მარტო დატოვოს, პარტნიორების გარეშე.

ეს ყველაფერი სასაცილოა, როცა ნახევარი საათით ადრე გატყობინებს სასამართლო სხდომის ჩანიშვნას. ბადრის და ჩვენს იურისტებს დაურეკეს და უთხრეს, რომ სასამართლო სხდომა ჩაინიშნა. ეს არის ცინიზმი. ქვეყანაში სასამართლო არ არის, ისევე, როგორც სხვა ინსტიტუციები. ისინი იმის რევიზიას ახდენენ, რაც მათივე სასამართლოში არის მიღებული“, – განაცხადა მამუკა ხაზარაძემ მისი თანაგუნდელის ბადრი ჯაფარიძის სასამართლო სხდომასთან დაკავშირებით.