ევროპარლამენტში საქართველოსთან დაკავშირებით დებატები გაიმართა, რომლის ფარგლებში დეპუტატებმა ქვეყანაში მიმდინარე პოლიტიკური და დემოკრატიული პროცესები განიხილეს. განხილვა დაახლოებით ერთი საათის განმავლობაში გაგრძელდა და სხვადასხვა პოლიტიკური ჯგუფის წარმომადგენლებმა ერთმანეთისგან განსხვავებული შეფასებები წარმოადგინეს.
ევროკავშირის საბჭოს თავმჯდომარე ქვეყნის — დანიის — ევროპის საქმეთა მინისტრმა მარი ბიერემ განაცხადა, რომ ერთი წლის წინ ათასობით ქართველი მოქალაქე ქუჩაში გამოვიდა დემოკრატიული უფლებების, სამოქალაქო თავისუფლებებისა და ქვეყნის ევროპული კურსის დასაცავად. მისი თქმით, მიუხედავად პოლიტიკური ზეწოლისა და შეზღუდვების მცდელობებისა, მოქალაქეებმა გამძლეობა გამოავლინეს და მკაფიოდ დააფიქსირეს ევროპული ინტეგრაციის მხარდაჭერა. ბიერემ ასევე აღნიშნა, რომ ევროკავშირმა, მათ შორის ევროპარლამენტმა, არაერთხელ გამოხატა შეშფოთება საქართველოში დემოკრატიული პროცესების უკუსვლასთან დაკავშირებით. მისივე თქმით, მიმდინარე წელს საქართველო ჩამოშორდა პარლამენტთაშორის რეგიონულ თანამშრომლობას იმ პერიოდში, როდესაც დიალოგის საჭიროება განსაკუთრებით მნიშვნელოვანია.
დებატების დროს სიტყვით გამოვიდა ევროპარლამენტარი რასა იუკნევიჩიენე, რომელმაც კოლეგებს მადლობა გადაუხადა სახაროვის პრემიის ორ დაპატიმრებულ ჟურნალისტზე გაცემისთვის. მისი განცხადებით, ანდჟეი პოჩობუტსა და მზია ამაღლობელს, მიუხედავად გეოგრაფიული დაშორებისა, აერთიანებთ თავისუფლებისთვის ბრძოლა. იუკნევიჩიენემ ასევე ისაუბრა „ბიბისის“ მიერ მომზადებულ ფილმზე და ევროკომისიასა და ევროპის საბჭოს საერთაშორისო დამოუკიდებელი გამოძიების დაწყებისკენ მოუწოდა.
სხვა პოზიცია წარმოადგინა ევროპარლამენტარმა ტიერი მარიანიმ. მისი განცხადებით, საქართველო ბოლო თვეების განმავლობაში ევროპული ინსტიტუტების მხრიდან ძლიერი მედიაკრიტიკის ობიექტია, რაც, მისი შეფასებით, ეჭვქვეშ აყენებს ქვეყნის სახელმწიფო ინსტიტუტების ლეგიტიმურობას, სასამართლო სისტემასა და ამომრჩევლის ნებას. მარიანის თქმით, აღნიშნული პროცესები უცხოური არასამთავრობო ორგანიზაციებისა და ქსელების ჩარევასთან არის დაკავშირებული, ხოლო ევროპარლამენტში გამოთქმული შეშფოთება ამ კონტექსტში უნდა განიხილებოდეს.
დებატებში ასევე მონაწილეობდა ევროპარლამენტარი კრისტიან ტერჰესი, რომელმაც განაცხადა, რომ ევროკავშირმა პარტნიორ ქვეყნებთან, მათ შორის საქართველოსთან, ურთიერთობა არ უნდა გამოიყენოს შიდა პოლიტიკური დაპირისპირებების ინსტრუმენტად. ამავე განხილვისას ევროპარლამენტარმა მალგოჟატა გოშევსკამ კვლავ გააკეთა მოწოდება ყოფილი პრეზიდენტის, მიხეილ სააკაშვილის გათავისუფლების შესახებ და აღნიშნა, რომ, მისი შეფასებით, საქართველოში არსებული კრიზისი პოლიტიკურ ფარგლებს სცდება.
ევროკომისარმა მაიკლ მაკგრატმა განაცხადა, რომ ევროკავშირი მხარს უჭერს საქართველოს მოქალაქეებს დემოკრატიული და ევროპული მომავლის მოთხოვნაში. მისი თქმით, მოქმედი ხელისუფლების პირობებში ქვეყანა შორდება დემოკრატიულ სტანდარტებს და ირღვევა ადამიანის უფლებებისა და კანონის უზენაესობის ის კრიტერიუმები, რომლებიც უვიზო მიმოსვლის პირობებს უკავშირდება. მაკგრატის განცხადებით, უვიზო რეჟიმის შეჩერების მექანიზმის შესახებ ანგარიში კვირის ბოლოს გამოქვეყნდება.
ევროპარლამენტში გამართულ დებატებს მმართველი პარტია „ქართული ოცნება“ ორმაგი სტანდარტების გამოყენების მაგალითად აფასებს. პარლამენტის თავმჯდომარემ, შალვა პაპუაშვილმა, სოციალურ ქსელში გამოქვეყნებულ განცხადებაში აღნიშნა, რომ მისი შეფასებით, ევროპარლამენტის სხდომაზე დისკუსიის ნაცვლად კრიტიკული და არაზუსტი შეფასებები ისმოდა. პაპუაშვილის თქმით, ასეთი მიდგომა არ შეესაბამება იმ ევროპულ ღირებულებებს, რომელთა თანამონაწილედაც საქართველო თავს მიიჩნევს.