ისრაელის პარლამენტმა  ორშაბათს მესამე და საბოლოო მოსმენით მიიღო კანონი, რომელიც ტერორისტულ თავდასხმებში მსჯავრდებული პალესტინელებისთვის სასჯელად სიკვდილით დასჯას  განსაზღვრავს.

კანონპროექტს მხარი დაუჭირა 62-მა დეპუტატმა, წინააღმდეგი კი 48 იყო. ინიციატივას მხარდაჭერა გამოუცხადა ისრაელის პრემიერ-მინისტრმა, ბენიამინ ნეთანიაჰუმ.

ახალი რეგულაციის მიხედვით, ისრაელის მიერ ოკუპირებულ დასავლეთ სანაპიროზე მცხოვრები პალესტინელები, რომლებიც ისრაელის სამხედრო სასამართლოების მიერ „ტერორისტულ აქტებად“ კვალიფიცირებული თავდასხმებისთვის არიან მსჯავრდებულნი, ექვემდებარებიან სიკვდილით დასჯას ჩამოხრჩობის გზით. განაჩენის აღსრულება უნდა განხორციელდეს 90 დღის ვადაში, რომელიც შესაძლოა 180 დღემდე გახანგრძლივდეს, თუმცა კანონი არ ითვალისწინებს შეწყალების შესაძლებლობას.

თეორიულად, აღნიშნული ნორმა შეიძლება გავრცელდეს ისრაელის მოქალაქეებზეც, თუმცა პრაქტიკაში ეს ნაკლებად მოსალოდნელია. კანონმდებლობა სიკვდილით დასჯას უკავშირებს იმ შემთხვევებს, როდესაც თავდასხმის მიზნად „ისრაელის სახელმწიფოს არსებობის უარყოფა“ განისაზღვრება. ისრაელში მსჯავრდებული პირებისთვის კი სასჯელი შესაძლოა სიცოცხლის ბოლომდე პატიმრობით ჩანაცვლდეს.

კრიტიკოსთა შეფასებით, ეს გარემოება ქმნის ვითარებას, როდესაც სიკვდილით დასჯა ფაქტობრივად მხოლოდ პალესტინელებზე გავრცელდება, მაშინ როდესაც ანალოგიური დანაშაულისთვის მსჯავრდებული ებრაელი ისრაელელები ამ სასჯელს, სავარაუდოდ, არ დაექვემდებარებიან. ამავე კონტექსტში, ახალი კანონი შეფასებულია როგორც დისკრიმინაციული, ხოლო რამდენიმე ევროპული ქვეყანა მიუთითებს, რომ იგი შესაძლოა საფრთხეს უქმნიდეს დემოკრატიულ პრინციპებს.

კანონის მიღება აქტიურად წაახალისეს ულტრამემარჯვენე პოლიტიკური ძალების წარმომადგენლებმა, განსაკუთრებით 2023 წლის 7 ოქტომბრის მოვლენების შემდეგ, როდესაც ჰამასის მიერ განხორციელებული თავდასხმები ისრაელის თანამედროვე ისტორიაში ყველაზე სისხლიან დღედ შეფასდა.

ინიციატივის ერთ-ერთი მთავარი მხარდამჭერი იყო ეროვნული უსაფრთხოების მინისტრი, იტამარ ბენ-გვირი, და მისი პარტია. კენჭისყრის დასრულების შემდეგ მან სოციალურ ქსელ X-ში დაწერა: „ჩვენ შევედით ისტორიაში!!! დავპირდით – შევასრულეთ“.

ამავე პარტიის წევრმა ლიმორ სონ-ჰარ-მელეხიმ, რომელიც წარსულში პალესტინელი მებრძოლების თავდასხმას გადაურჩა, თუმცა   მეუღლე დაკარგა, განაცხადა, რომ აღნიშნული კანონი აუცილებელია. მისი თქმით, მისი მეუღლის მკვლელობაში მონაწილე ერთ-ერთი პირი მოგვიანებით გათავისუფლდა და 2023 წლის 7 ოქტომბრის თავდასხმებშიც მიიღო მონაწილეობა.