რომის პაპ ლეო XIV-ს ფილტვის კიბო დაუდგინდა. ინფორმაციას Reuters-ი ვატიკანის სამედიცინო ბიულეტენზე დაყრდნობით ავრცელებს.

გავრცელებული ცნობით, 71 წლის პონტიფიკოსს ფილტვის ადენოკარცინომა აღმოაჩნდა. დიაგნოზი ოპერაციის დროს ჩატარებულმა ქსოვილის ანალიზმა დაადასტურა. ქირურგებმა მას მარჯვენა ფილტვის ნაწილი ამოკვეთეს.

პაპი 13 ოქტომბერს რომის „ჯემელის“ საავადმყოფოში გადაიყვანეს მას შემდეგ, რაც გეგმური სამედიცინო შემოწმებისას ფილტვზე წარმონაქმნი აღმოუჩინეს.

მისი მთავარი ქირურგის, სტეფანო მარგარიტორასა და პირადი ექიმის, ლუიჯი კარბონეს განცხადებით, ოპერაცია დაახლოებით 90 წუთს გაგრძელდა და გართულებების გარეშე დასრულდა.

ვატიკანის სამედიცინო ბიულეტენის თანახმად, ქირურგიული ჩარევის შემდეგ პაპი გონზე მოვიდა და საავადმყოფოს პალატაში გადაიყვანეს.

Reuters-ის ცნობით, ვატიკანს დაავადების სტადია ჯერჯერობით არ დაუზუსტებია. პონტიფიკოსი, სავარაუდოდ, საავადმყოფოში დაახლოებით ერთ კვირას დარჩება, ხოლო მისი საჯარო ღონისძიებები 20 ოქტომბრამდე გაუქმებულია.