პოპმუსიკის ისტორიაში ერთ-ერთი ყველაზე ცნობილი შემსრულებლის, მაიკლ ჯექსონის საკულტო ნივთები აუქციონზე გაიყიდება. მათ შორისაა მუსიკალური კლიპის „Thriller“-ის წითელ-შავი ქურთუკი, კრისტალებით გაფორმებული ხელთათმანი, რომლითაც მომღერალმა ცნობილი საცეკვაო მოძრაობა „მთვარის სიარული“ შეასრულა, და ფეხსაცმლის ორი წყვილი.
აუქციონს კომპანია Julien’s Auctions 7 დეკემბერს, არაბთა გაერთიანებული საამიროების დედაქალაქ აბუ-დაბიში გამართავს. ღონისძიება სამდღიანი პროგრამის, Celebrity & Pop Culture Experience-ის ნაწილია, რომელიც 7-9 დეკემბერს სასტუმრო Rosewood Abu Dhabi-ში ჩატარდება.
აუქციონის ერთ-ერთი მთავარი ლოტი 1983 წელს გადაღებული „Thriller“-ის კლიპის წითელ-შავი ტყავის ქურთუკია. მისი დიზაინი კოსტიუმების მხატვარმა დებორა ნადულმან ლენდისმა შექმნა.
კლიპისთვის სულ ორი ქურთუკი დამზადდა. გასაყიდად გამოტანილია ის ეგზემპლარი, რომელიც ჯექსონს იმ სცენებში ეცვა, სადაც ზომბის გრიმის გარეშე ჩნდება. მეორე ქურთუკი სპეციალურად დააზიანეს ზომბის სცენებისთვის და ის მომღერლის მემკვიდრეობის მმართველი ორგანიზაციის საკუთრებაში რჩება.
გასაყიდ ქურთუკზე შემორჩენილია თავად ჯექსონის ავტოგრაფი და მისი კოსტიუმების დიზაინერების, მაიკლ ბუშისა და დენის ტომპკინსისადმი მიძღვნილი წარწერა.
აღსანიშნავია, რომ ეს ქურთუკი 2011 წელს აუქციონზე 1,8 მილიონ დოლარად გაიყიდა. ამჯერად ორგანიზატორებს მისი სავარაუდო ღირებულება საჯაროდ არ გამოუქვეყნებიათ.
კიდევ ერთი მნიშვნელოვანი ლოტია კრისტალებით გაფორმებული ხელთათმანი, რომელიც ჯექსონს 1983 წელს სატელევიზიო შოუს Motown 25: Yesterday, Today, Forever დროს ეკეთა. სწორედ ამ გამოსვლაზე, სიმღერის „Billie Jean“ შესრულებისას, მომღერალმა ფართო სატელევიზიო აუდიტორიას პირველად წარუდგინა საცეკვაო მოძრაობა Moonwalk, რომელიც მოგვიანებით მისი შემოქმედების ერთ-ერთ მთავარ სიმბოლოდ იქცა.
ხელთათმანის სავარაუდო ღირებულება 600-800 ათასი დოლარია. ნივთი ბოლოს 2009 წელს, ასევე Julien’s Auctions-ის აუქციონზე, 430 ათას დოლარად გაიყიდა.
აუქციონზე წარმოდგენილი იქნება ჯექსონის ფეხსაცმლის ორი წყვილიც. „Thriller“-ის გადაღებებისა და რეპეტიციების დროს გამოყენებული ფეხსაცმელი 30-50 ათას დოლარადაა შეფასებული. მას თან ახლავს მომღერლის მიერ ქორეოგრაფ მაიკლ პიტერსისთვის მიწერილი სამადლობელი წერილი.
მეორე წყვილი, რომელიც ჯექსონს „Motown 25“-ის გამოსვლის რეპეტიციებისას ეცვა, სავარაუდოდ, 60-80 ათას დოლარად გაიყიდება.
აუქციონის ორგანიზატორების განცხადებით, ეს ნივთები მხოლოდ ცნობილი შემსრულებლის პირადი გარდერობის ნაწილი არ არის, ისინი პოპმუსიკის, ცეკვისა და მოდის ისტორიაში მნიშვნელოვანი გარდატეხის პერიოდს უკავშირდება.
გასაყიდი ნივთები აუქციონამდე საერთაშორისო საგამოფენო ტურნეში მონაწილეობენ. კოლექცია 7 ოქტომბერს ლოს-ანჯელესში წარადგინეს, რის შემდეგაც გამოფენები აშშ-ში, იაპონიასა და ბაჰრეინში დაიგეგმა. 29 ნოემბრიდან 5 დეკემბრამდე ნივთები აბუ-დაბიში, სასტუმრო Emirates Palace Mandarin Oriental-ში გამოიფინება.
Julien’s Auctions-ის თანადამფუძნებლის, მარტინ ნოლანის განცხადებით, კომპანიისთვის განსაკუთრებული მნიშვნელობა აქვს იმ ნივთების ხელახლა წარდგენას, რომლებმაც მუსიკისა და პოპულარული კულტურის ისტორიაში მნიშვნელოვანი ადგილი დაიკავეს.
მაიკლ ჯექსონი, რომელიც 2009 წელს 50 წლის ასაკში გარდაიცვალა, დღემდე პოპმუსიკის ერთ-ერთ ყველაზე გავლენიან შემსრულებლად მიიჩნევა. მისი სასცენო კოსტიუმები, საცეკვაო მოძრაობები და მუსიკალური კლიპები კი კოლექციონერებისა და თაყვანისმცემლების განსაკუთრებული ინტერესის საგნად რჩება.
