დღეს, 19:00 საათზე, „ოპოზიციური ალიანსი“ თსუ-ს პირველი კორპუსიდან პარლამენტისკენ საპროტესტო მარშს გამართავს, სადაც პოლიტიკური ლიდერების გამოსვლებია დაგეგმილი.

თბილისის მერიამ და შინაგან საქმეთა სამინისტრომ აქციის რუსთაველის გამზირზე ჩატარებისა და სცენის დამონტაჟების ნებართვა არ გასცეს. მერიამ მიზეზად დამოუკიდებლობის დღის ოფიციალური ღონისძიებები და სატრანსპორტო ნაკადების შეფერხება დაასახელა, ხოლო შსს-მ – ორგანიზატორების მიერ განცხადების წარდგენის ვადებისა და კანონით დადგენილი მოთხოვნების დარღვევა.

უწყებების უარყოფითი პოზიციის მიუხედავად, „ოპოზიციური ალიანსი“ გეგმების შეცვლას არ აპირებს. ორგანიზატორები აცხადებენ, რომ აქცია მაინც ჩატარდება და ისინი პარლამენტთან სცენის დამონტაჟებას მაინც შეეცდებიან.

გაერთიანების წევრმა, ირაკლი ფავლენიშვილმა თსუ-სთან შეკრებილ მედიის წარმომადგენლებს განუცხადა, რომ მმართველი გუნდი აქციის მონაწილეებისთვის ხელის შეშლას და ხელოვნური ბარიერების შექმნას ვერ მოახერხებს.

ფავლენიშვილის განმარტებით, საზოგადოება არ აპირებს ეროვნული დღესასწაულის ორგანიზების ექსკლუზიური უფლება „ქართულ ოცნებას“ დაუტოვოს, რომელსაც ის ანტიეროვნულ ნაბიჯებსა და კრემლის მითითებების შესრულებაში ადანაშაულებს.

ოპოზიციონერმა პოლიტიკოსმა აღნიშნა, რომ ათი ათასობით მოქალაქე მტკიცე გადაწყვეტილებით იკრიბება, რათა ერთის მხრივ პატივი მიაგონ ამ ისტორიულ თარიღს და მეორეს მხრივ, საკუთარი პროტესტი ქვეყნის შიგნით თუ მის ფარგლებს გარეთ მკაფიოდ გააჟღერონ. მისივე თქმით, დამოუკიდებლობის დღესასწაულის მართვა მხოლოდ იმ ძალის ხელში ვერ დარჩება, რომლის პოლიტიკაც ქვეყნის ისტორიულ მტრებთან კოლაბორაციას ჰგავს.

აქციის განრიგი: „ოპოზიციური ალიანსის” ორგანიზებით, საპროტესტო მარში დღეს, 19:00 საათზე, თბილისის სახელმწიფო უნივერსიტეტის პირველი კორპუსის მიმდებარე ტერიტორიიდან დაიწყება. დემონსტრანტები რუსთაველის გამზირის გავლით პარლამენტის შენობისკენ გაემართებიან, სადაც აქცია პოლიტიკური ლიდერების სიტყვით გამოსვლებით გაგრძელდება.