რუსეთის პრეზიდენტის, ვლადიმერ პუტინის განცხადებით, ევროკავშირმა რუსეთის წინააღმდეგ დაწესებული სანქციებისა და რუსულ ენერგორესურსებზე უარის თქმის ეკონომიკურ შედეგებთან ადაპტირება ვერ შეძლო. ამის შესახებ მან ჩინეთის ქალაქ შენჟენში, აზია-წყნარი ოკეანის ეკონომიკური თანამშრომლობის (APEC) სამიტზე სიტყვით გამოსვლისას განაცხადა.
პუტინის შეფასებით, ევროკავშირის მიერ რუსეთის ბაზარსა და ენერგორესურსებზე უარის თქმამ უარყოფითი გავლენა მოახდინა ევროპული ეკონომიკის სამრეწველო პოტენციალსა და საერთაშორისო კონკურენტუნარიანობაზე.
„ევროკავშირმა ვერ შეძლო მათთან (სანქციებთან) ადაპტირება, მათ შორის, ჩვენს ბაზარზე უარის ნებაყოფლობით გადაწყვეტილებასთან და რუსული ენერგორესურსების იაფი და სტაბილური მიწოდების შეწყვეტასთან, რომლებიც ათწლეულების განმავლობაში უზრუნველყოფდა მის კეთილდღეობას. ის კარგავს სამრეწველო პოტენციალსა და კონკურენტულ ბრძოლაში პოზიციებს“, – განაცხადა რუსეთის პრეზიდენტმა.
პუტინმა ასევე ისაუბრა რუსეთის ეკონომიკაზე საგარეო სანქციებისა და საერთაშორისო ზეწოლის გავლენის შესახებ.
მისი მტკიცებით, დაწესებულმა შეზღუდვებმა ხელი შეუწყო რუსეთის შიდა წარმოების განვითარებას, ტექნოლოგიური დამოუკიდებლობის გაძლიერებასა და შრომის პროდუქტიულობის ზრდას.
„გარე ზეწოლა რუსეთისთვის მნიშვნელოვან სტიმულად იქცა, ხელი შეუწყო ტექნოლოგიური სუვერენიტეტის განმტკიცებას, შრომის პროდუქტიულობის ზრდასა და შიდა ბაზრის ხარისხიანი ადგილობრივი პროდუქციით უზრუნველყოფას“, – აღნიშნა პუტინმა.
APEC-ის სამიტის ფარგლებში ვლადიმერ პუტინმა შეხვედრა გამართა ჩინეთის პრეზიდენტ სი ძინპინთან. გავრცელებული ინფორმაციით, მხარეებმა საერთაშორისო ვითარება და ორმხრივი ურთიერთობების საკითხები განიხილეს.
რუსეთის პრეზიდენტის განცხადებით, მოსკოვისა და პეკინის საერთო მიზანია აზია-წყნარი ოკეანის რეგიონში მშვიდობისა და კეთილდღეობის უზრუნველყოფა.
„რუსეთ-ჩინეთის საგარეო პოლიტიკური ურთიერთობები სტაბილური და პოზიტიურია. რთულ გეოპოლიტიკურ სიტუაციაში ჩვენ ვიყენებთ კონსტრუქციულ მიდგომებს უფრო სამართლიანი, მრავალპოლარული მსოფლიო წესრიგის ჩამოსაყალიბებლად”, – განაცხადა პუტინმა.
რუსეთის პრეზიდენტმა გამოსვლისას ევროკავშირის სანქციების ეკონომიკური შედეგები და რუსეთის შიდა ეკონომიკური განვითარების საკითხები ერთმანეთთან დააკავშირა, ხოლო ჩინეთთან ურთიერთობებზე საუბრისას ყურადღება საერთაშორისო თანამშრომლობასა და მრავალპოლარული მსოფლიო წესრიგის საკითხებზე გაამახვილა.