რუსეთსა და უკრაინაში ახალი სარაკეტო და უპილოტო საფრენი აპარატებით განხორციელებული თავდასხმების შესახებ იუწყებიან. უკრაინული მედიის ინფორმაციით, რუსეთის ძალებმა კიევს რაკეტების რამდენიმე ტალღით შეუტიეს, რის შედეგადაც დედაქალაქის კრიტიკული ინფრასტრუქტურა დაზიანდა. პარალელურად, მოსკოვის ხელისუფლება ქალაქის მიმართულებით დრონების მასშტაბური შეტევის მოგერიების შესახებ ავრცელებს ინფორმაციას. გავრცელებული ცნობებით, განმეორებითი თავდასხმის შედეგად დაზიანებულია ყირიმის ხიდიც.

სარაკეტო თავდასხმა კიევზე

უკრაინული მედიის ცნობით, რუსეთის ძალებმა კიევზე რამდენიმე ტალღისგან შემდგარი სარაკეტო იერიში განახორციელეს. ძლიერი აფეთქებების ხმა ისმოდა ქალაქის მარჯვენა სანაპიროზე, ობოლონისა და ვიდუბიჩის მიდამოებში.

კიევის მერის, ვიტალი კლიჩკოს განცხადებით, თავდასხმის სამიზნე ქალაქის ჩრდილოეთ და სამხრეთ ხიდები გახდა.

მოგვიანებით კლიჩკომ განაცხადა, რომ იერიშის შედეგად კრიტიკულად მნიშვნელოვანი ინფრასტრუქტურული სისტემები დაზიანდა.

„ზოგიერთ რაიონში წყლისა და გათბობის მიწოდება შეფერხებულია“, – აღნიშნა კიევის მერმა.

სარაკეტო თავდასხმის საფრთხე გამოცხადდა ჩერკასისა და დნიპროს რაიონებშიც, სადაც, გავრცელებული ინფორმაციით, აფეთქებების ხმა ისმოდა.

მოსკოვის მიმართულებით დრონების შეტევა

მოსკოვის მერის, სერგეი სობიანინის განცხადებით, რუსეთის საჰაერო თავდაცვის ძალებმა დედაქალაქის მიმართულებით მიმავალი კიდევ 20 უპილოტო საფრენი აპარატი ჩამოაგდეს.

„თავდაცვის სამინისტროს საჰაერო თავდაცვის სისტემამ მოსკოვის მიმართულებით მიმავალი ოცი უპილოტო საფრენი აპარატი ჩამოაგდო. ნამსხვრევების ჩამოვარდნის ადგილზე საგანგებო სამსახურები მუშაობენ“, – განაცხადა სობიანინმა.

რუსული მედიის ინფორმაციით, 17 ნოემბრის დღის დასაწყისიდან მოსკოვის მიმართულებით მიმავალი 113 დრონის შეტევა მოიგერიეს.

ამავე წყაროების ცნობით, 16 ნოემბრის 20:00 საათიდან, მოსკოვის დროით, საჰაერო თავდაცვის სისტემებმა ჯამში 270 უპილოტო საფრენი აპარატის შეტევა მოიგერიეს.

განმეორებითი თავდასხმა ყირიმის ხიდზე

ყირიმის ხიდზე განმეორებითი თავდასხმის შესახებ ინფორმაციას უკრაინული მედია და „ტელეგრამარხები“ ავრცელებენ.

მათი ცნობით, დაახლოებით შუაღამისას ქერჩის ხიდის მიმდებარე ტერიტორიაზე ძლიერი აფეთქებები მოხდა.

რუსეთის მიერ ანექსირებული ყირიმის ხელმძღვანელად დანიშნულმა სერგეი აქსიონოვმა ბოლო 24 საათის განმავლობაში ხიდზე მეორე თავდასხმა დაადასტურა და მოძრაობის შეჩერების შესახებ განაცხადა.

ASTRA-ს ინფორმაციით, თავდასხმის შედეგად დაზიანდა ხიდის ერთ-ერთი თაღი და ჩამოინგრა გზის საფარის ნაწილი.

გავრცელებული ცნობებით, ყირიმის ხიდზე თავდასხმა წინა დღესაც განხორციელდა, რის გამოც სატრანსპორტო მოძრაობა თითქმის 17 საათის განმავლობაში იყო შეზღუდული.

ცნობისთვის, ყირიმის ხიდი რუსეთის მიერ ანექსირებულ ყირიმის ნახევარკუნძულს რუსეთის ტერიტორიასთან აკავშირებს და სატრანსპორტო და სამხედრო ლოგისტიკისთვის გამოიყენება.