რუსეთის საგარეო საქმეთა მინისტრმა სერგეი ლავროვმა განაცხადა, რომ უკრაინის სამხრეთ-აღმოსავლეთი რეგიონები და ქვეყნის ცენტრალური ნაწილის მნიშვნელოვანი ტერიტორია, მათ შორის დედაქალაქი კიევი, რუსეთის მიწებია. ინფორმაციას რუსული სახელმწიფო საინფორმაციო სააგენტო TASS ავრცელებს.
ლავროვის განცხადებით, უკრაინის მთელი ტერიტორია „ერთიანი ხალხის საცხოვრებელ ადგილად“ ვერ ჩაითვლება.
რუსეთის საგარეო საქმეთა მინისტრმა უკრაინის სხვადასხვა რეგიონს შორის ისტორიულ და კულტურულ განსხვავებებზეც ისაუბრა.
მისი თქმით, უკრაინის დასავლეთ ნაწილში ჩამოყალიბებულია „კულტურა და ღირებულებები“, რომლებიც რუსეთს ეწინააღმდეგება.
ლავროვის განცხადებები უკრაინის ტერიტორიული კუთვნილების შესახებ მოსკოვის ოფიციალური წარმომადგენლის პოზიციას ასახავს და ეწინააღმდეგება უკრაინის საერთაშორისოდ აღიარებულ საზღვრებს.
საერთაშორისო სამართლის მიხედვით, კიევი და ლავროვის მიერ ნახსენები რეგიონები უკრაინის სუვერენული ტერიტორიის ნაწილია.
რუსეთის საგარეო საქმეთა მინისტრის განცხადება გაკეთდა უკრაინის წინააღმდეგ მიმდინარე ომისა და ქვეყნის ტერიტორიული მთლიანობის საკითხზე არსებული საერთაშორისო დაპირისპირების ფონზე.
წყარო: TASS.