ბაჰრეინში ირანის მიერ განხორციელებული თავდასხმის შედეგად სამოქალაქო სამრეწველო ობიექტზე ხანძარი გაჩნდა. ქვეყნის ხელისუფლების ინფორმაციით, შემთხვევის შედეგად არავინ დაშავებულა. პარალელურად, ირანის ისლამური რევოლუციის გუშაგთა კორპუსმა განაცხადა, რომ ბაჰრეინში განლაგებულ ამერიკულ სამხედრო ობიექტებზე სარაკეტო და უპილოტო საფრენი აპარატებით შეტევა განახორციელა.

ინფორმაციას სააგენტო Reuters ავრცელებს.

ბაჰრეინის შინაგან საქმეთა სამინისტროს განცხადებით, სამრეწველო ობიექტზე გაჩენილი ხანძრის ლიკვიდაციისთვის სამოქალაქო თავდაცვის ჯგუფები მუშაობდნენ. უწყებას ობიექტის ადგილმდებარეობისა და დანიშნულების შესახებ დამატებითი ინფორმაცია არ გაუვრცელებია.

თავდასხმის დაწყებამდე ბაჰრეინის ხელისუფლებამ მოსახლეობას შესაძლო საფრთხის შესახებ საგანგებო გაფრთხილება გაუგზავნა და მოქალაქეებს უახლოეს უსაფრთხო ადგილებში გადასვლისკენ მოუწოდა.

მოგვიანებით საფრთხის დასრულების შესახებ შეტყობინება გავრცელდა, თუმცა გარკვეული პერიოდის შემდეგ ხელისუფლებამ მოსახლეობა შესაძლო თავდასხმის შესახებ ხელახლა გააფრთხილა.

ბაჰრეინის საჰაერო თავდაცვამ რამდენიმე შეტევა მოიგერია

ბაჰრეინის თავდაცვის ძალების განცხადებით, ქვეყნის საჰაერო თავდაცვის სისტემებმა ირანის მხრიდან განხორციელებული რამდენიმე საჰაერო შეტევა მოიგერიეს.

უწყების ინფორმაციით, საჰაერო სამიზნეების განადგურების შედეგად ჩამოცვენილმა ნამსხვრევებმა მატერიალური ზიანი გამოიწვია, თუმცა მსხვერპლი არ ყოფილა.

ბაჰრეინის თავდაცვის ძალებმა ირანი ქვეყნის წინააღმდეგ სისტემატური მტრული მოქმედებების გაგრძელებაში დაადანაშაულეს.

ირანი ამერიკულ სამხედრო ბაზებზე თავდასხმას ადასტურებს

ირანის ისლამური რევოლუციის გუშაგთა კორპუსის განცხადებით, მისმა საჰაერო-კოსმოსურმა ძალებმა ბაჰრეინში მდებარე ამერიკულ სამხედრო პოზიციებზე კომბინირებული სარაკეტო და დრონებით შეტევა განახორციელეს.

ირანის სახელმწიფო საინფორმაციო სააგენტო IRNA-ს მიერ გავრცელებული განცხადების თანახმად, სამიზნეებად დასახელდა ალ-რიფასა და ავალის სამხედრო ბაზებზე არსებული ამერიკული პოზიციები.

ირანული მხარის მტკიცებით, ოპერაცია განხორციელდა „მიმდინარე აგრესიისა და ირანის საჰაერო სივრცის განმეორებითი დარღვევების საპასუხოდ“.

Reuters-ის ინფორმაციით, აშშ-ის შეიარაღებული ძალების ცენტრალურ სარდლობას ირანის განცხადებასთან დაკავშირებით კომენტარი დაუყოვნებლივ არ გაუკეთებია.

ბაჰრეინში განთავსებულია აშშ-ის სამხედრო-საზღვაო ძალების მეხუთე ფლოტის შტაბი, რის გამოც ქვეყანას სპარსეთის ყურის რეგიონში ამერიკული სამხედრო ინფრასტრუქტურისთვის მნიშვნელოვანი სტრატეგიული დანიშნულება აქვს.

რეგიონში სამხედრო დაძაბულობა გრძელდება

ბაჰრეინში განხორციელებული თავდასხმები ახლო აღმოსავლეთში მიმდინარე სამხედრო დაპირისპირების მორიგი ეპიზოდია.

Reuters-ის ცნობით, რეგიონული დაძაბულობა განსაკუთრებით გამწვავდა მას შემდეგ, რაც მიმდინარე წლის თებერვალში აშშ-მა და ისრაელმა ირანზე სამხედრო შეტევები განახორციელეს.

ამის შემდეგ კონფლიქტში სპარსეთის ყურის არაბული სახელმწიფოებიც აღმოჩნდნენ ჩართული. ირანის მხრიდან რეგიონში არაერთი სარაკეტო და დრონებით შეტევა განხორციელდა.

ბაჰრეინის ხელისუფლებამ ბოლო დღეებშიც რამდენჯერმე განაცხადა ირანული საჰაერო თავდასხმების მოგერიების შესახებ.