“ცდილობენ, ამ არასამთავრობო ორგანიზაციების დესტრუქციული ქმედებები გაამართლონ. სახელმწიფო იქნება შეუვალი! ჩვენი ქვეყანა, მისი ხელისუფლება იქნება შეუვალი ყველა იმ გამოვლინების მიმართ, რომელიც კონსტიტუციის მიღმა შეეცდება ხელისუფლების წინააღმდეგ ქმედებას, ხალხის დეზინფორმირებას, ხალხთან და საზოგადოებასთან მიმართებით ძალადობრივ და ძალმომრეობრივ ქმედებას. რა თქმა უნდა, კანონის სრული დაცვითა და კანონის ფარგლებში იქნება მიღებული გადაწყვეტილება.

ის, რაც პაუერმა აღიარა, მდგომარეობს შემდეგში, რომ წლების განმავლობაში, მილიონობით დოლარი, უდიდესი ფინანსური რესურსი იხარჯებოდა USAID-ის მიერ სხვადასხვა ქვეყანაში, მათ შორის, უკრაინასა და მოლდოვაში, სასურველი მთავრობების დასახმარებლად და არასასურველი ხელისუფლების მოსაცილებლად. „ქართული ოცნების“ ხელისუფლება ზუსტად ის ხელისუფლებაა, რომელიც დონალდ ტრამპის მიერ გაცხადებულ პოლიტიკას დიდი ხანია უკვე ესატყვისება და აცხადებს პირდაპირ, რომ USAID-დან ეს თანხები სწორედ დემოკრატიის საწინააღმდეგოდ, რევოლუციების, ქაოსის მოსაწყობად გამოიყენებოდა. დუმილი აშშ-ის ადმინისტრაციის მხრიდან და ღიად მხარდაჭერა, ბუნებრივია, ბევრ კითხვის ნიშანს და ამ მიმართულებით გარკვეულ მოსაზრებებსაც ბადებს,”-აღნიშნული განცხადება შვიდი არასამთავრობო ორგანიზაციის ანგარიშების დაყადაღებასთან დაკავშირებით “ქართული ოცნების“ დეპუტატმა დავით მათიკაშვილმა გააკეთა.