ევროპარლამენტარებმა და სხვადასხვა ქვეყნის ოფიციალურმა წარმომადგენლებმა საქართველოში საპროტესტო აქციების დაწყების წლისთავთან დაკავშირებით განცხადებები გაავრცელეს. 

,,ბოლო ერთი წლის განმავლობაში, ყოველდღე, მამაცი ქართველები აგრძელებდნენ გამოხატვის თავისუფლებისა და მშვიდობიანი დემონსტრაციების უფლების გამოყენებას. ისინი ამას აკეთებენ ძალადობის, დაპატიმრებებისა და მზარდი რეპრესიების ფონზე. შვედეთი გააგრძელებს თავისუფალი, დემოკრატიული და პლურალისტური საქართველოს მხარდაჭერას,”-ამის შესახებ შვედეთის საგარეო საქმეთა მინისტრი, მარია სტენერგარდი სოციალურ პლატფორმა X-ზე წერს. 

ბრიტანელი პარლამენტარის, ჯეიმს მაკკლირის განცხადებით, საქართველო ვლადიმერ პუტინის ჰიბრიდული ომის წინა ხაზზეა. ,,მხარს ვუჭერთ ქართველებს “ქართულ ოცნებასთან” მათ წინააღმდეგობაში. საქართველო ვლადიმერ პუტინის ჰიბრიდული ომის წინა ხაზზეა. მათი დემოკრატია და ევროპული მომავალი თავდასხმის ქვეშაა. ერთი წლის შემდეგ, ქართველებმა უნდა გააგრძელონ თავიანთი ზეწოლა და იბრძოლონ თავიანთი მომავლისთვის,”- წერს მაკკლირი.

საქართველოში განვითარებულ მოვლენებს გამოეხმაურა  ლიეტუვის საგარეო საქმეთა მინისტრი, კესტუტის ბუდრისიც. ბუდრისის თქმით, „ქართული ოცნება“ ავრცელებს დეზინფორმაციას, რომელიც მიზანში ევროკავშირსა და წევრ ქვეყნებს იღებს, რასაც სულ უფრო მზარდად მტრული, კრემლის სტილის რიტორიკა ახლავს თან. მისი განცხადებით, ლიეტუვამ ეროვნულ დონეზე სანქციები დაუწესა 112 პირს და გააგრძელებს ქართველი ხალხის გვერდში დგომას.

,, ერთი წელი გავიდა მას შემდეგ, რაც “ქართული ოცნების” წარმომადგენლებმა გააჩერეს საქართველოს ევროკავშირში გაწევრიანების პროცესი, ქვეყანა კიდევ უფრო დააშორეს დემოკრატიულ ღირებულებებს, საერთაშორისო ვალდებულებებს, კანონის უზენაესობასა და ქართველი ხალხის ევროატლატიკურ მისწრაფებებს. ამ დროის განმავლობაში, საქართველოს მასშტაბით ასობით მშვიდობიანი დემონსტრანტი დააკავეს და დააპატიმრეს, ხოლო ათობით სხვა უკანონო სასამართლო პროცედურების წინაშე დგას, ზოგიერთი სისხლის სამართლის ბრალდებების დონეზეც. დიპლომატები და საჯარო მოსამსახურეები, რომლებიც ევროკავშირში ინტეგრაციის შეჩერების წინააღმდეგ პეტიციის ხელმოწერით ეწინააღმდეგებოდნენ, “ქართული ოცნების” მცდელობას შეცვალონ ქვეყნის გეოპოლიტიკური კურსი, სამსახურიდან გაათავისუფლეს და სამუშაოს გარეშე დატოვეს. ამ პერიოდის განმავლობაში ადამიანის უფლებები და ფუნდამენტური თავისუფლებები საქართველოში სასტიკად შეიზღუდა. დამოუკიდებელი მედია და სამოქალაქო საზოგადოების ორგანიზაციები იჩაგრებიან, ხოლო ოპოზიციური პარტიები და მათი ლიდერები მმართველი პარტიის მხრიდან მათი კანონგარეშე გამოცხადებისა და მათი “აკრძალვის” მცდელობების წინაშე დგანან. ეს მოვლენები არა მხოლოდ არღვევენ ევროკავშირი-საქართველოს ასოცირების შეთანხმების დებულებებს, კერძოდ კი მის მე-2 მუხლს, არამედ საქართველოს იმ სტანდარტების გაცილებით დაბლა აყენებენ, რომლებსაც კანდიდატი ქვეყნისგან ელიან. ეს დადასტურდა ევროკავშირის გაფართოების ბოლო ანგარიშით, რომელმაც ცხრა მთავარ პუნქტზე უკუსვლა აღნიშნა, რომლებიც საფუძვლად უდევს საქართველოს კანდიდატის სტატუსს. ,,ქართული ოცნება” აგრძელებს ევროკავშირის განმეორებით მოთხოვნების იგნორირებას, დაუბრუნდეს დემოკრატიულ გზას, რაზეც პირობა დადო, დაიცვას ფუნდამენტური უფლებები, უზრუნველყოს დამოუკიდებელი სასამართლო სისტემა, და პატივი სცეს კანონის უზენაესობას. ამის მაგივრად, ის ავრცელებს დეზინფორმაციას, რომელიც მიზანში ევროკავშირსა და წევრ ქვეყნებს იღებს, რასაც სულ უფრო მზარდად მტრული კრემლის სტილის რიტორიკა ახლავს თან. ამ პრობლემური მოვლენების ფონზე, ლიეტუვა თანმიმდევრულად გვერდში უდგას ქართველ ხალხს. საქართველოს საკითხი ბრიუსელში ჩვენს ევროკავშირის შეხვედრებსა და სხვა საერთაშორისო ორგანიზაციებში წამოვაყენეთ, ადვოკატირებას ვუწევდით პრინციპულ და ერთიან პასუხს. სამწუხაროდ, ზოგიერთი წევრი სახელმწიფოს ხელის შემშლელი პოზიციის გამო, არც ერთი დამნაშავე არ დასანქცირებულა ევროკავშირის მიერ. ამის მიუხედავად, ლიეტუვამ ეროვნულ დონეზე სანქციები დაუწესა 112 პირს. დღეს, საქართველოს ხალხს სოლიდარობა გამოვუცხადე – მათ შორის ჩვენს კოლეგა დიპლომატებსა და საჯარო მოსამსახურეებს, რომლებიც ევროკავშირში ინტეგრაციის შეჩერების წინააღმდეგ პეტიციის ხელმოწერისთვის გაათავისუფლეს – და ყველა მშვიდობიან დემონსტრანტს, რომლებიც დემოკრატიული საქართველოსა და მისი ევროპული მომავლისადმი ერთგულების უშიშრად დემონსტრირებაში არ შეჩერებულან, ერთი დღითაც კი. გავაგრძელებთ თქვენს გვერდში დგომას!” – წერს ლიეტუვის საგარეო საქმეთა მინისტრი.

  ესტონეთის საგარეო საქმეთა მინისტრმა, მარგუს ცაჰკნამ, სოციალურ ქსელში გამოქვეყნებულ პოსტში მხარდაჭერა გამოხატა ქართველების მიმართ დემოკრატიული, ევროპული მომავლისადმი მისწრაფებებში.

“დღეს ერთი წელი სრულდება საქართველოში მასობრივი პროტესტების დაწყებიდან. ათასობით მოქალაქე მამაცად დადგა თავიანთი ქვეყნის დემოკრატიული გზისთვის. პატივს ვცემთ ყველა ქართველს, ვინც აგრძელებს ფუნდამენტური უფლებებისა და თავისუფლებების დაცვას, ცოცხლად ინარჩუნებს თავისუფალი და დემოკრატიული საქართველოს რწმენას. თქვენი სიმყარე, ღირსება და ევროპული ღირებულებებისადმი ურყევი ერთგულება ნამდვილად შთამაგონებლად რჩება – ძლიერი შემახსენებელი იმისა, რომ დემოკრატიის სულს ვერ გააჩუმებ. ესტონეთი მყარად უდგას ქართველებს გვერდში, მხარს უჭერს დემოკრატიული, ევროპული მომავლისადმი თქვენს მისწრაფებებს”,-წერს მარკუს ცაჰკნა.

საქართველოში საპროტესტო აქციების წლისთავთან დაკავშირებით ერთობლივ განცხადებას ავრცელებენ აშშ-ის სენატის საგარეო საქმეთა კომიტეტის თავმჯდომარე, სენატორი ჯიმ რიში და კომიტეტის ,,დემოკრატების” ლიდერი, ჯინ შაჰინი. 

„ერთი წლის წინ, საქართველო თავისი ისტორიის ახალ, ბნელ პერიოდში შევიდა. საარჩევნო კამპანიის დროს საქართველოს ევროპული ინტეგრაციის გაგრძელების დაპირების მიუხედავად, რომელსაც ქართველი ხალხის უმრავლესობა მხარს უჭერს, მთავრობამ პოზიცია შეცვალა და კონსტიტუციური ვალდებულება დაარღვია. აღნიშნულის საპასუხოდ, ქართველები ქუჩებში გამოვიდნენ, ცვლილებების მოთხოვნით და მთავრობის მიერ ამომრჩევლების ხმების უგულებელყოფის წინააღმდეგ დემონსტრაციის მიზნით. ამის შემდეგ ერთი წლის განმავლობაში, საქართველოს ხელისუფლებამ ამომრჩეველთა შეშფოთებების მოსმენისა და ოპოზიციასთან მუშაობის ნაცვლად, მათ ჩასახშობად უპრეცედენტო ნაბიჯები გადადგა, ავტორიტარული კანონების მიღებით, პოლიტიკური ოპოზიციის წევრების დაკავებითა და აკრძალვით, სამოქალაქო საზოგადოების ლიდერების დაშინებით და აშშ-ისა და მისი საელჩოს თანამშრომლების წინააღმდეგ ცილისწამებით. როგორც ამერიკელები, ჩვენ ვაფასებთ ქართველი ხალხის უნარს, რომ ნებისმიერი ფასის მიუხედავად, საკუთარი თავისუფლება არ დათმოს. როგორც საქართველოს ახლო მეგობრები, პოლიტიკურ მოვლენებს უკვე ერთი წელია ვაკვირდებით და ჩვენ საქართველოს წარმატებით ვართ დაინტერესებულები. ქართველი ხალხი იმსახურებს ისეთ ხელმძღვანელობას, რომელიც პატივს სცემს მის უფლებას, რომ საკუთარი მომავალი თავად განსაზღვროს,”-აღნიშნულია სენატორების მიერ გავრცელებულ ერთობლივ განცხადებაში.