„რეზერვების სტატისტიკა გამჭვირვალეა – პერიოდულად ვაქვეყნებთ. რეზერვების მოცულობაზე გავლენას ახდენს არამხოლოდ ეროვნული ბანკის აქტივობა, არამედ თუნდაც საგარეო ვალის მომსახურება. საგარეო ვალის მომსახურება აისახება დინამიკაზე, როდესაც საგარეო ვალის დაფარვა გეგმაზომიერად ხდება. რაც შეეხება ეროვნული ბანკის ინტერვენციებს, იანვარ-თებერვალში არანაირი ინტერვენცია არ განგვიხორციელებია – უცხოური ვალუტა ბაზარზე არც გვიყიდია და არც გაგვიყიდია. მარტიდან იწყება ის პერიოდი, რომელიც ტრადიციულად გვაძლევს შესაძლებლობას, რომ რეზერვები შევავსოთ და ბაზარზე ვალუტა შევიძინოთ. ეს შემდეგ თვეში ქვეყნდება ხოლმე. მიზანშეწონილი არ არის, რომ უშუალოდ ამ პერიოდში რასაც ვაკეთებთ, ის ვთქვათ, იმისთვის, რომ სპეკულაციური განწყობები არ წავახალისოთ. ზოგადად, ქვეყანაში ვალუტის კარგი, ძლიერი შემოდინებებია. სწორედ ამის გამო ლარი გამყარდა კიდეც. თებერვლის ინფლაცია გამოქვეყნდა და მიზნობრივ 3%-ზე დაბალია – 2.4%. ანუ, ყველაფერი იმაზე მიგვანიშნებს, რომ ჩვენ რეზერვების შევსების დაწყებას შევძლებთ“, – ამის შესახებ ეროვნული ბანკის პრეზიდენტმა, ნათია თურნავამ განაცხადა.