ადამიანის უფლებათა ევროპულმა სასამართლომ (ECHR) 2008 წლის აგვისტოს ომის დროს დაკავებული ქართველი სამხედროების საქმეებზე რუსეთის ფედერაციის პასუხისმგებლობა დაადგინა.
„საქართველოს ახალგაზრდა იურისტთა ასოციაციის“ (საქართველოს ახალგაზრდა იურისტთა ასოციაცია) ინფორმაციით, სტრასბურგის სასამართლოში მიღებული გადაწყვეტილებით დადგინდა, რომ რუსეთის ფედერაციას შეერაცხება ქართველი სამხედრო ტყვეების – მათ შორის გიორგი ანწუხელიძეს, ასევე კახაბერ ხუბულურისა და უშანგი სოფრომაძის მკვლელობა და სხვა პირების მიმართ წამების ფაქტები.
სასამართლოს შეფასებით, აღნიშნული პირები იმყოფებოდნენ ტერიტორიაზე, სადაც რუსეთი ეფექტიან კონტროლს ახორციელებდა. გადაწყვეტილებაში აღნიშნულია, რომ ანწუხელიძე ბოლოს „სამხრეთ ოსეთის“ ძალების პატიმრობაში ძალადობისა და სიკვდილით მუქარის პირობებში ნახეს, ხოლო მისი გარდაცვალების გარემოებები დღემდე ბოლომდე გაურკვეველი რჩება, თუმცა სასამართლო მიიჩნევს, რომ ის ძალადობის შედეგად გარდაიცვალა.
საია-ს თავმჯდომარის, თამარ ონიანის განცხადებით, გადაწყვეტილება პრეცედენტულია, რადგან ევროპულმა სასამართლომ ომის აქტიური ფაზის პირობებში რუსეთის იურისდიქცია და პასუხისმგებლობა პირველად ასე მკაფიოდ დაადგინა სამხედრო ტყვეებთან დაკავშირებულ საქმეებზე.
სასამართლომ რუსეთს ასევე დააკისრა სამართლიანი დაკმაყოფილების გადახდა საერთო ჯამში 395 000 ევროს ოდენობით. საია აცხადებს, რომ ორგანიზაცია 18 წელია იცავს 2008 წლის ომის შედეგად დაზარალებულთა ინტერესებს და მომავალშიც გააგრძელებს ამ მიმართულებით მუშაობას.