“ ნიდერლანდების მთავრობამ გადაწყვიტა, რომ უკრაინის წინააღმდეგ აგრესიის დანაშაულთან დაკავშირებული სპეციალური ტრიბუნალის არ მხოლოდ მოსამზადებელ ეტაპებს, არამედ სრულ ოპერატიულ ფაზასაც თავის ტერიტორიაზე უმასპინძლოს,”  – უკრაინული მედიის ცნობით, ამის შესახებ უკრაინის საგარეო საქმეთა მინისტრი ანდრეი სიბიგა სოციალურ ქსელში   წერს.

უკრაინული მედია წერს, რომ პირველი ფაზა გარდამავალ ეტაპს წარმოადგენს, რომლის ფარგლებშიც ჰააგა ინსტიტუტის „ჩონჩხს“ ქმნის და ის მოიცავს: 15 მოსამართლის შერჩევას, რეგისტრატორის დანიშვნას, ძირითადი პერსონალის თანდათანობით დაკომპლექტებას, პროცედურული წესების დამტკიცებას, საერთაშორისო თანამშრომლობის ხელშეკრულებების დადებას და ადმინისტრაციული და ტექნიკური ინფრასტრუქტურის შექმნას. ამ ეტაპზე ტრიბუნალი ჯერ არ ახორციელებს მართლმსაჯულებას, არამედ ასრულებს მზადებას მისი სრული ამოქმედებისთვის.  მეორე ფაზა  ითვალისწინებს სპეციალური ტრიბუნალის სრულ ფუნქციონირებას. მოსამზადებელი ეტაპების დასრულების შემდეგ, ინსტიტუტი იწყებს საკუთარი იურისდიქციის განხორციელებას: იწყება გამოძიებები, ბრალდებების წაყენება, სასამართლო პროცესები და სასჯელის დაკისრება აგრესიის დანაშაულისთვის.  ამ დროისთვის უნდა შეიქმნას ყველა ძირითადი ორგანო, უზრუნველყოფილი უნდა იყოს მუდმივი შენობა-ნაგებობები, უსაფრთხოების ინფრასტრუქტურა და საერთაშორისო თანამშრომლობის მექანიზმები, რომლებიც აუცილებელია მართლმსაჯულების ეფექტური განხორციელებისთვის.  „ეს გადაწყვეტილება ორგანიზაციულ საკითხს გაცილებით სცილდება. ის აჩვენებს საერთაშორისო საზოგადოების მზადყოფნას, ანგარიშვალდებულების იდეის მხარდაჭერის გარდა, ისეთი ინსტიტუტის შექმნაზე გადავიდეს, რომელიც მას პრაქტიკაში უზრუნველყოფს“, – აცხადებს სიბიგა.  მისი თქმით, სპეციალური ტრიბუნალი საბოლოოდ სცილდება კონცეფციებისა და პოლიტიკური დისკუსიების სფეროს და რეალურ ინსტიტუციურ კონტურებს იძენს.

შეგახსენებთ, 15 მაისს, ევროპის საბჭოს მინისტრთა კომიტეტის სხდომაზე უკრაინის წინააღმდეგ აგრესიის დანაშაულთან დაკავშირებით სპეციალური ტრიბუნალის შექმნას მხარი დაუჭირეს. უკრაინის პრეზიდენტმა ვოლოდიმირ ზელენსკიმ 4  ივლისს   განაცხადა, რომ ნიდერლანდების მთავრობამ გამოთქვა მზადყოფნა, სპეციალურ ტრიბუნალს უმასპინძლოს.