ევროკავშირის მიერ დაბალი ღირებულების ონლაინამანათებზე დაწესებულმა დამატებითმა გადასახადებმა შესაძლოა, 2028–2034 წლებში გაერთიანების ბიუჯეტს ყოველწლიურად 6 მილიარდი ევრო მოუტანოს. ახალი რეგულაციები განსაკუთრებით ჩინურ ონლაინსავაჭრო პლატფორმებს, მათ შორის Shein-სა და Temu-ს შეეხება.
ამის შესახებ Reuters ევროკომისიის შიდა დოკუმენტზე დაყრდნობით იუწყება.
ევროკავშირის გადაწყვეტილება უკავშირდება იაფი ონლაინშეკვეთების სწრაფ ზრდას, რომელთა დიდი ნაწილი ჩინეთიდან იგზავნება. ევროკომისიის შეფასებით, ასეთი ამანათების მნიშვნელოვანი ნაწილი საბაჟო დეკლარაციებში რეალურ ღირებულებაზე ნაკლები ფასით არის მითითებული, რაც საბაჟო გადასახადების თავიდან არიდების შესაძლებლობას ქმნის.
რა იცვლება 1 ნოემბრიდან?
ევროკავშირში 1 ნოემბრიდან 150 ევროზე ნაკლები ღირებულების ონლაინამანათებზე დამატებით 2-ევროიანი მოსაკრებელი ამოქმედდა.
ეს გადასახადი დაემატება 3-ევროიან მოსაკრებელს, რომელიც მიმდინარე წლის ივლისიდან მოქმედებს. შესაბამისად, ცალკეულ დაბალფასიან საქონელზე დაწესებული დამატებითი გადასახადების ჯამი 5 ევროს მიაღწევს.
ევროკომისიის მონაცემებით, 2025 წელს ევროკავშირში 150 ევროზე ნაკლები ღირებულების 5.8 მილიარდი ამანათი შევიდა, რაც წინა წელთან შედარებით 26%-ით მეტია.
ევროკავშირის შეფასებით, ონლაინვაჭრობის ამ მასშტაბის ზრდა დამატებით გამოწვევებს ქმნის როგორც საბაჟო კონტროლის, ისე ადგილობრივი ბიზნესის კონკურენტუნარიანობისა და პროდუქციის უსაფრთხოების მიმართულებით.
რატომ ზრდის ევროკავშირი გადასახადებს?
ევროპარლამენტის წევრის, დირკ გოტინკის განცხადებით, რომელიც ევროკავშირის საბაჟო რეფორმებზე მუშაობას ხელმძღვანელობს, ახალი მოსაკრებლის მიზანია ჩინეთიდან დაბალი ღირებულების, ევროკავშირის მოთხოვნებთან შეუსაბამო პროდუქციის მასობრივი იმპორტის შეზღუდვა.
მისი შეფასებით, დამატებითი შემოსავლები ევროკავშირს საბაჟო სისტემის გაძლიერებისა და ერთიანი ბაზრის დაცვის შესაძლებლობას მისცემს.
ევროკომისიის პროგნოზით, ახალი გადასახადებიდან მიღებული თანხის დაახლოებით 90% ევროკავშირის ბიუჯეტში გადაირიცხება, ხოლო 10% წევრ სახელმწიფოებს დარჩებათ.
თუმცა ეს განაწილება საბოლოო არ არის. 2028–2034 წლების ბიუჯეტზე მოლაპარაკებები გრძელდება და წევრმა ქვეყნებმა შესაძლოა, შემოსავლების უფრო დიდი წილის შენარჩუნება მოითხოვონ.
ამჟამად ევროკავშირის წევრი სახელმწიფოები შესაბამისი მოსაკრებლებიდან მიღებული თანხების 25%-ს ინარჩუნებენ.
როგორ აისახება ცვლილებები Shein-სა და Temu-ზე?
ახალი რეგულაციები განსაკუთრებით იმ პლატფორმებისთვის ქმნის გამოწვევას, რომელთა ბიზნესმოდელი დაბალი ღირებულების პროდუქციის პირდაპირ მომხმარებლისთვის მიწოდებას ეფუძნება.
Temu-ს მფლობელმა PDD Holdings-მა აგვისტოში განაცხადა, რომ ევროკავშირის გადაწყვეტილება მისი ბიზნესის გარკვეულ მიმართულებებზე მნიშვნელოვან გავლენას მოახდენდა, თუმცა შესაძლო ფინანსური ზარალის მოცულობა არ დაუკონკრეტებია.
Reuters-ის ინფორმაციით, Temu ზოგიერთ მომხმარებელს დამატებითი მოსაკრებლების კომპენსაციის მიზნით ფასდაკლებებს სთავაზობს. კომპანია ცდილობს, შეამციროს ახალი გადასახადების გავლენა იმ მომხმარებლებზე, რომლებიც პლატფორმაზე განსაკუთრებით იაფ პროდუქციას ყიდულობენ.
Shein-ის შემოსავლების დაახლოებით მესამედი ევროპულ ბაზარზე მოდის. კომპანიის გაყიდვები რეგიონში გადასახადების ამოქმედებამდეც შემცირებული იყო, რასაც ფასების ზრდა და სარეკლამო ხარჯების შემცირება ახლდა.
კომპანია ამჟამად პოლონეთში სასაწყობე ინფრასტრუქტურას აფართოებს და აცხადებს, რომ მისი პრიორიტეტი კონკურენტული ფასების შენარჩუნება, მიწოდების დაჩქარება და მომხმარებლებისთვის მომსახურების გამარტივებაა.
ჩინური კომპანიები მიწოდების მოდელს ცვლიან
ახალი გადასახადების საპასუხოდ ჩინური ონლაინსავაჭრო პლატფორმები ევროპაში ადგილობრივი საწყობების განვითარებას აჩქარებენ.
AliExpress-მა, რომელიც Alibaba-ს ეკუთვნის, განაცხადა, რომ ევროპაში სასაწყობე ინფრასტრუქტურას აფართოებს.
ამასთან, კომპანია აფრთხილებს, რომ დამატებითმა გადასახადებმა შესაძლოა განსაკუთრებით დაბალშემოსავლიან მომხმარებლებზე იმოქმედოს და ევროპაში ცხოვრების ხარჯების ზრდა კიდევ უფრო გაამწვავოს.
განსხვავებული მდგომარეობაა ამერიკულ Amazon-ში. კომპანიის განცხადებით, ევროკავშირში გაყიდული პროდუქციის 97% გაერთიანების ტერიტორიაზე არსებული საწყობებიდან იგზავნება, რის გამოც ახალი მოსაკრებლები მისი შეკვეთების მხოლოდ მცირე ნაწილს შეეხება.
წყარო: Reuters