ისრაელის პრეზიდენტი ისააკ ჰერცოგი ახალი მთავრობის ფორმირების მანდატის გადაცემის შესახებ გადაწყვეტილებას კვირას, 8 ნოემბერს, გამოაცხადებს. პრეზიდენტის განცხადებით, საპარლამენტო პარტიებთან გამართული კონსულტაციების მიუხედავად, ჯერ კიდევ გაურკვეველია, რომელი პოლიტიკური ლიდერი შეძლებს მმართველი კოალიციის ჩამოყალიბებას.
მთავრობის ფორმირების მანდატის მიღების კანდიდატები მოქმედი პრემიერ-მინისტრი, პარტია „ლიკუდის“ ლიდერი ბენიამინ ნეთანიაჰუ და მისი მთავარი პოლიტიკური კონკურენტი, პარტია „იაშარის“ ხელმძღვანელი გადი აიზენკოტი არიან.
ქნესეთის ფრაქციებთან კონსულტაციების შედეგად, 120 დეპუტატიდან 67-მა მთავრობის ფორმირებისთვის აიზენკოტის კანდიდატურას დაუჭირა მხარი, ხოლო 46-მა – ნეთანიაჰუს. დანარჩენმა შვიდმა დეპუტატმა არცერთი კანდიდატი არ წარადგინა.
მიუხედავად იმისა, რომ აიზენკოტმა პარლამენტართა უმრავლესობის რეკომენდაცია მიიღო, ჰერცოგის განმარტებით, ეს ავტომატურად არ ნიშნავს, რომ მას სტაბილური მთავრობის ჩამოყალიბება შეუძლია.
პრეზიდენტმა ყურადღება გაამახვილა პოლიტიკურ ბლოკებს შორის არსებულ უთანხმოებებზე და აღნიშნა, რომ პარტიების მიერ ერთმანეთთან თანამშრომლობაზე უარის თქმა კოალიციის ფორმირებას ართულებს.
ჰერცოგის განცხადებით, გადაწყვეტილების მიღებამდე რამდენიმე პარტიის ლიდერთან დამატებით ინდივიდუალურ შეხვედრებს გამართავს, რათა დაადგინოს, რომელ კანდიდატს აქვს მთავრობის ფორმირების რეალური შესაძლებლობა.
ისრაელში საპარლამენტო არჩევნები 27 ოქტომბერს გაიმართა. არჩევნების შედეგად, „ლიკუდმა“ 27 მანდატი მოიპოვა და ყველაზე მრავალრიცხოვანი პარტია გახდა, თუმცა ნეთანიაჰუს პოლიტიკურმა ბლოკმა პარლამენტში უმრავლესობის მისაღებად საჭირო 61 ადგილი ვერ მიიღო.
აიზენკოტის მხარდამჭერ ბლოკსაც დამოუკიდებლად მთავრობის ჩამოყალიბებისთვის საკმარისი მანდატები არ აქვს.
ისრაელის კანონმდებლობის თანახმად, პრეზიდენტის მიერ შერჩეულ კანდიდატს მთავრობის ფორმირებისთვის თავდაპირველად 28 დღე მიეცემა. საჭიროების შემთხვევაში, ეს ვადა შესაძლოა, დამატებით 14 დღით გაგრძელდეს.
ახალი მთავრობის ჩამოყალიბებამდე ბენიამინ ნეთანიაჰუ პრემიერ-მინისტრის მოვალეობის შესრულებას გააგრძელებს.