გერმანიის თავდაცვის მინისტრმა ბორის პისტორიუსმა გააკრიტიკა აშშ-ის თავდაცვის უწყების წარმომადგენლის განცხადება, რომლის თანახმადაც, უკრაინის მიერ რუსეთის ტერიტორიაზე განხორციელებული შორ მანძილზე დარტყმები ომის დასრულებას არ უწყობს ხელს და ფრონტზე რუსეთის წინსვლას ვერ აფერხებს.
ინფორმაციას გამოცემა The Guardian ავრცელებს.
პისტორიუსმა აღნიშნული განცხადება ბრიუსელში, უკრაინის მოკავშირე ქვეყნების მოლაპარაკებების მორიგი რაუნდის შემდეგ გააკეთა.
აშშ-ის თავდაცვის მდივნის მოადგილემ, ელბრიჯ კოლბიმ, 17 ნოემბერს განაცხადა, რომ რუსეთის ტერიტორიის სიღრმეში განხორციელებული დარტყმები, მიუხედავად მათ მიმართ მაღალი საზოგადოებრივი ინტერესისა, ომის დასრულების თვალსაზრისით ეფექტიანი არ აღმოჩნდა.
მისი შეფასებით, ამგვარი სამხედრო ოპერაციები ვერც ფრონტის ხაზზე რუსეთის სამხედრო ძალების წინსვლას აფერხებს.
გერმანიის თავდაცვის მინისტრმა ამერიკელი მაღალჩინოსნის პოზიციას უპასუხა და უკრაინის მიერ რუსეთის ტერიტორიაზე სამხედრო დანიშნულების ობიექტებზე განხორციელებული დარტყმების კრიტიკას „საკმაოდ სულელური“ უწოდა.
„რუსეთის ტერიტორიაზე იმგვარი დარტყმების კრიტიკა, რომელთა მიზანი სტრატეგიული სამხედრო და სამხედრო დანიშნულებით გამოყენებული ობიექტების განადგურებაა, საკმაოდ სულელურია“, – განაცხადა პისტორიუსმა.
მისივე თქმით, საერთაშორისო საზოგადოების ყურადღება უკრაინის სამოქალაქო ინფრასტრუქტურაზე რუსეთის თავდასხმებისკენ უნდა იყოს მიმართული.
„ამის კრიტიკის ნაცვლად, უმჯობესია ვისაუბროთ და გავაკრიტიკოთ ის ტერორისტული დარტყმები, რომლებიც ყოველ ღამე და ყოველდღე ხორციელდება უკრაინის ენერგეტიკულ, წყალმომარაგებისა და გათბობის ინფრასტრუქტურაზე. ეს ტერორიზმის ერთ-ერთი ფორმაა“, – აღნიშნა გერმანიის თავდაცვის მინისტრმა.
ბრიტანეთი უკრაინის სამხედრო ოპერაციებს მხარს უჭერს
The Guardian-ის ინფორმაციით, უკრაინის მიერ რუსეთის ტერიტორიაზე განხორციელებული დარტყმების მნიშვნელობაზე ისაუბრა დიდი ბრიტანეთის თავდაცვის მინისტრმა უეს სტრიტინგმაც.
მისი შეფასებით, აღნიშნულმა ოპერაციებმა რუსეთის სამხედრო შესაძლებლობების შესუსტებას შეუწყო ხელი, უკრაინას დამატებითი დრო მისცა და ადამიანების სიცოცხლის გადარჩენაში მნიშვნელოვანი როლი შეასრულა.
ამასთან, უკრაინის წარმომადგენელმა ევჰენი ხმარამ განაცხადა, რომ კიევი სამხედრო სტრატეგიის შეცვლას არ გეგმავს.
„მსურს, რუსეთის ფედერაციამ მკაფიო გზავნილი მიიღოს: ჩვენს ტერიტორიაზე განხორციელებულ თითოეულ დარტყმას ორჯერ ან სამჯერ უფრო ძლიერი პასუხი მოჰყვება. ჩვენ საკუთარი თავის დაცვის უფლება გვაქვს“, – განაცხადა ხმარამ.
აშშ-სა და ევროპას შორის განსხვავებული მიდგომები
The Guardian-ის შეფასებით, გერმანიისა და აშშ-ის თავდაცვის უწყებების წარმომადგენლებს შორის საჯარო უთანხმოებამ უკრაინის ომთან დაკავშირებით ვაშინგტონისა და ევროპელი მოკავშირეების განსხვავებული მიდგომები გამოავლინა.
დისკუსია განსაკუთრებით აქტუალურია აშშ-ის პრეზიდენტ დონალდ ტრამპის, რუსეთის პრეზიდენტ ვლადიმირ პუტინისა და ჩინეთის პრეზიდენტ სი ძინპინის დაგეგმილი სამმხრივი შეხვედრის წინ.
სამი ქვეყნის ლიდერები 19 ნოემბერს ჩინეთის ქალაქ შენჟენში უნდა შეხვდნენ ერთმანეთს. მოსალოდნელია, რომ მოლაპარაკებების ერთ-ერთი მთავარი საკითხი უკრაინაში მიმდინარე ომი იქნება.
კანადა რუსეთის წინააღმდეგ სანქციების გამკაცრებას გეგმავს
ამავე დროს, კანადის პრემიერ-მინისტრმა მარკ კარნიმ განაცხადა, რომ უკრაინაში ომის გაგრძელების შემთხვევაში რუსეთის წინააღმდეგ სანქციები კიდევ უფრო გამკაცრდება.
კარნიმ აღნიშნული განცხადება შენჟენში, აზია-წყნარი ოკეანის ეკონომიკური თანამშრომლობის ორგანიზაციის (APEC) სამიტზე გააკეთა.
„სანქციები რეალურია და ისინი კიდევ უფრო გამკაცრდება, ვიდრე ეს ომი გაგრძელდება“, – განაცხადა კანადის პრემიერ-მინისტრმა.
ევროკავშირი უკრაინის მხარდაჭერის ახალ ინსტრუმენტს წარადგენს
ევროკომისია უკრაინის დახმარების ახალი მექანიზმის – „უკრაინის კოორდინირებული მხარდაჭერის ინსტრუმენტის“ – წარდგენას გეგმავს.
The Guardian-ის ინფორმაციით, ინიციატივა ევროკომისიის პრეზიდენტმა ურზულა ფონ დერ ლაიენმა, ეკონომიკის საკითხებში ევროკომისარმა ვალდის დომბროვსკისმა და თავდაცვის საკითხებში ევროკომისარმა ანდრიუს კუბილიუსმა უნდა წარადგინონ.