ამერიკის შეერთებული შტატების მიერ აზიის ქვეყნებთან გაფორმებული სავაჭრო შეთანხმებებით გათვალისწინებული სასოფლო-სამეურნეო პროდუქციის ექსპორტის მიზნები სრულად არ სრულდება. ამის შესახებ სააგენტო Reuters ათი სავაჭრო შეთანხმების შესწავლის საფუძველზე იუწყება.

სააგენტოს მონაცემებით, ჩინეთი მიმდინარე წელს დაახლოებით 25 მილიონი ტონა ამერიკული სოიოს შეძენის გზაზეა, თუმცა სხვა სასოფლო-სამეურნეო პროდუქციის იმპორტი შეთანხმებით განსაზღვრულ მაჩვენებლებს მნიშვნელოვნად ჩამორჩება.

კერძოდ, მაისიდან ჩინეთმა 2,5 მილიარდ დოლარზე ნაკლები ღირებულების სხვა ამერიკული აგროპროდუქცია შეიძინა, მაშინ როდესაც შეთანხმებით გათვალისწინებული წლიური სამიზნე მაჩვენებელი 17 მილიარდ დოლარს შეადგენს.

Reuters-ის ინფორმაციით, სავაჭრო შეთანხმებების შესრულების შეფერხებები სხვა აზიურ ქვეყნებშიც ფიქსირდება, მათ შორის ინდონეზიაში, მალაიზიასა და ბანგლადეშში.

ინდონეზიამ სექტემბრის მდგომარეობით ამერიკული სოიოს წლიური შესყიდვის ვალდებულების მხოლოდ 54% შეასრულა.

ამასთან, მალაიზიაში ამერიკული ღორის ხორცის ექსპორტი 52%-ით შემცირდა.

აღნიშნული მონაცემები მიუთითებს, რომ აზიის ქვეყნებთან გაფორმებული სავაჭრო შეთანხმებებით გათვალისწინებული სასოფლო-სამეურნეო პროდუქციის შესყიდვები ყველა მიმართულებით დაგეგმილი ტემპით არ მიმდინარეობს.

ამასთან, შეთანხმებებით განსაზღვრული წლიური მიზნების საბოლოო შესრულება დამოკიდებული იქნება დარჩენილ პერიოდში განხორციელებულ შესყიდვებზე.

წყარო: Reuters.