აშშ-ის წამყვანმა ტელეარხებმა თეთრ სახლში პრეზიდენტ დონალდ ტრამპის მონაწილეობით გამართული ღონისძიებების გაშუქება განაახლეს. ტელეარხებმა პარასკევს ჩინეთის პრეზიდენტ სი ძინპინის ვიზიტის ფარგლებში გამართული ღონისძიებები გააშუქეს. ინფორმაციას Reuters-ი ავრცელებს.
ტელეარხებმა გაშუქება მას შემდეგ განაახლეს, რაც ფედერალურმა მოსამართლემ CNN-ის, MS NOW-ისა და Politico-ს ჟურნალისტებისთვის თეთრ სახლში დაშვების აღდგენა დაავალა. მანამდე სხვა წამყვანმა ტელეარხებმა სამი მედიასაშუალების მიმართ სოლიდარობის ნიშნად საპრეზიდენტო ღონისძიებების ერთობლივ სატელევიზიო გაშუქებაში მონაწილეობა შეაჩერეს.
სი ძინპინთან შეხვედრისას ტრამპმა ჟურნალისტების კითხვებს მედიასაშუალებებისთვის დაწესებული აკრძალვის შესახებ არ უპასუხა, მოგვიანებით კი მედიას გაშუქებისთვის მადლობა გადაუხადა.
„ჩვენ ვაფასებთ მიუკერძოებელ გაშუქებას. ეს მიუკერძოებელი იყო. ჩვენ ამას ვაფასებთ“, — განაცხადა ტრამპმა.
ამასთან, CNN-ის განცხადებით, მოგვიანებით მის ჟურნალისტებს ტრამპთან ერთად საპრეზიდენტო თვითმფრინავით ტენესიში გამგზავრების უფლება არ მისცეს. თეთრ სახლს ამ საკითხზე კომენტარი არ გაუკეთებია.
ტრამპმა CNN-ს, MS NOW-სა და Politico-ს თეთრ სახლში შესვლა მათი გაშუქების გამო აუკრძალა. სამივე მედიასაშუალებამ ადმინისტრაციას სასამართლოში უჩივლა და განაცხადა, რომ გადაწყვეტილება აშშ-ის კონსტიტუციის პირველი შესწორებით დაცულ პრესისა და სიტყვის თავისუფლებას არღვევდა.
24 სექტემბერს ფედერალურმა მოსამართლემ სამი მედიასაშუალებისთვის თეთრ სახლში დაშვების დაუყოვნებლივ აღდგენა დაავალა. სამართლებრივი დავა კვლავ გრძელდება.