აშშ-ის პრეზიდენტის, დონალდ ტრამპის განცხადებით, რუსეთი ამერიკულ და მსოფლიო ბაზრებს დამატებით დიზელს მიაწვდის, რათა საწვავის ფასები შემცირდეს. შეთანხმების ფარგლებში ვაშინგტონმა რუსულ დიზელზე დაწესებული სანქციები დროებით შეამსუბუქა. – ინფორმაციას Reuters ავრცელებს.

ტრამპის თქმით, ვლადიმერ პუტინთან სატელეფონო საუბრისას შეთანხმდნენ, რომ რუსეთი დაუყოვნებლივ მიაწვდის ბაზრებს 300 ათას მეტრულ ტონაზე მეტ დიზელს. ნოემბერში იგეგმება დამატებით 500 ათასი ტონის, შემდეგ კი კიდევ ერთი მილიონი ტონის მიწოდება. შემდგომი მოცულობა რუსეთის ნავთობგადამამუშავებელი ქარხნების მდგომარეობაზე იქნება დამოკიდებული, რადგან მათ უკრაინის თავდასხმების შედეგად ზიანი მიადგა.

აშშ-ის ფინანსთა სამინისტრომ გასცა ლიცენზია, რომელიც რუსული დიზელის იმპორტს 7 აპრილამდე უშვებს.

შეთანხმება უკრაინის პრეზიდენტმა, ვოლოდიმირ ზელენსკიმ გააკრიტიკა და მას ძლიერი პარტნიორების სუსტი გადაწყვეტილება უწოდა. მისი შეფასებით, რუსეთისთვის ეკონომიკური შეღავათების მიცემა მშვიდობას ვერ მოიტანს და მოსკოვს ომის გაგრძელების შესაძლებლობას გაუზრდის.

სანქციების შემსუბუქებას რესპუბლიკელი კონგრესმენი დონ ბეკონიც ეწინააღმდეგება. მისი განცხადებით, ვაშინგტონმა რუსეთის სამხედრო მანქანაზე ზეწოლა უნდა გააძლიეროს.

შეთანხმების შესახებ განცხადების შემდეგ აშშ-ში დიზელის ფიუჩერსები თითქმის 5%-ით გაიაფდა. თუმცა ანალიტიკოსები მიიჩნევენ, რომ დამატებითი მიწოდება ფასების ხანგრძლივ შემცირებას, სავარაუდოდ, ვერ უზრუნველყოფს.

Reuters-ის ცნობით, 28 თებერვალს აშშ-ისა და ისრაელის მიერ ირანთან ომის დაწყების შემდეგ დიზელის ფასი დაახლოებით 70%-ით გაიზარდა. ამერიკის საავტომობილო ასოციაციის მონაცემებით, ხუთშაბათს აშშ-ში მისი საშუალო საცალო ღირებულება გალონზე 6,28 დოლარს შეადგენდა.

ამასთან, სააგენტოს ინფორმაციით, ტრამპის ადმინისტრაცია განიხილავს თავდაცვითი წარმოების შესახებ კანონის გამოყენებას ნავთობისა და საწვავის წარმოების გასაზრდელად. ინდუსტრიის წარმომადგენლები მიიჩნევენ, რომ არსებული ქარხნების გაფართოება და ეფექტიანობის გაუმჯობესება უფრო სწრაფ შედეგს გამოიღებს, ვიდრე ახალი საწარმოების მშენებლობა.