ყოფილი პრემიერ-მინისტრი ირაკლი ღარიბაშვილი მოთავსებულია რუსთავის №12 პენიტენციურ დაწესებულებაში. საქართველოს პროკურატურასა და ბრალდებულს შორის გაფორმებული საპროცესო შეთანხმების საფუძველზე, სასამართლომ იგი დამნაშავედ ცნო საქართველოს სისხლის სამართლის კოდექსის 194-ე მუხლის მესამე ნაწილით გათვალისწინებული დანაშაულის — უკანონო შემოსავლის ლეგალიზაციის — ჩადენაში, რაც განსაკუთრებით დიდი ოდენობით შემოსავლის მიღებას გულისხმობს.

სასამართლოს განაჩენით, ირაკლი ღარიბაშვილს სასჯელის სახედ და ზომად განესაზღვრა 5 წლით თავისუფლების აღკვეთა. ამასთანავე, დამატებითი სასჯელის სახით დაეკისრა 1 მილიონი ლარის ოდენობის ჯარიმა. განაჩენის თანახმად, სახელმწიფოს სასარგებლოდ ჩამოერთმევა დანაშაულებრივი საქმიანობის შედეგად მიღებული თანხები, მათ შორის ბრალდებულის საცხოვრებელი სახლის ჩხრეკისას ამოღებული ფულადი სახსრები, საერთო ჯამში დაახლოებით 6.5 მილიონი აშშ დოლარის ოდენობით. პროკურატურის განცხადებით, აღნიშნული თანხა გადარიცხული იქნება სახელმწიფო ბიუჯეტში.

საქმის პროკურორის, ნათია თათიაშვილის განმარტებით, სასამართლოს წარედგინა შუამდგომლობა საქმის არსებითი განხილვის გარეშე განაჩენის გამოტანის თაობაზე, რაც ბრალდებულის მიერ დანაშაულის სრულად აღიარებასა და საპროცესო შეთანხმების პირობებზე თანხმობას ეფუძნებოდა. სასამართლომ აღნიშნული შუამდგომლობა დააკმაყოფილა. პროკურორის განცხადებითვე, მიუხედავად იმისა, რომ საქმეში არსებობდა მოწმის არაერთი ჩვენება, საპროცესო შეთანხმების პირობების გათვალისწინებით, კონკრეტული პირების დასახელება ვერ მოხდება. ამასთან, დადასტურდა, რომ ირაკლი ღარიბაშვილის ოჯახს არ ჩამოერთმევა მათ საკუთრებაში არსებული ღვინის ქარხანა.

ირაკლი ღარიბაშვილის ადვოკატის, მიხეილ შაყულაშვილის განცხადებით, მისი დაცვის ქვეშ მყოფს აქვს ყველა ის უფლება, რაც კანონით განსაზღვრულია ნებისმიერი მსჯავრდებულისთვის, მათ შორის ვადაზე ადრე გათავისუფლებისა და შეწყალების უფლება. ადვოკატის განმარტებით, ბრალდება არ უკავშირდება სამსახურებრივ უფლებამოსილების ბოროტად გამოყენებას ან კორუფციულ გარიგებებს, არამედ ეხება საგადასახადო ვალდებულებების შეუსრულებლობის შედეგად უკანონო შემოსავლის ლეგალიზაციას. შაყულაშვილის თქმით, ღარიბაშვილმა ითანამშრომლა გამოძიებასთან მხოლოდ საკუთარ საქმეზე და არ გაუცია ჩვენება სხვა პირების წინააღმდეგ.

საქმეს ფართო პოლიტიკური და საზოგადოებრივი რეზონანსი მოჰყვა. მმართველი პარტიის ყოფილი დეპუტატი ალექსანდრე თამაზაშვილი სოციალურ ქსელში წერს, რომ ირაკლი ღარიბაშვილს არავისათვის მოუპარავს თანხა და მისი გადაწყვეტილება საპროცესო შეთანხმებაზე უარის თქმის ნაცვლად განპირობებული იყო ხანგრძლივი და დესტრუქციული სასამართლო პროცესის თავიდან აცილების სურვილით. მისი შეფასებით, ღარიბაშვილმა საკუთარი ნაბიჯით დაიცვა ის საქმე და სახელმწიფო ინტერესები, რომელსაც წლების განმავლობაში ემსახურებოდა.

საქართველოს მესამე პრეზიდენტმა მიხეილ სააკაშვილმა დაკავებას „ივანიშვილის მორიგი უსამართლობა“ უწოდა და გამოთქვა მოსაზრება, რომ ღარიბაშვილი შესაძლოა უახლოეს მომავალში გათავისუფლდეს. სააკაშვილმა საკუთარი საქმის მაგალითზე გაამახვილა ყურადღება და სასჯელების სიმკაცრის შედარებაზე ისაუბრა.

პარტია „ფედერალისტების“ თავმჯდომარემ გიგა ბოკერიამ განაცხადა, რომ ირაკლი ღარიბაშვილი არ წარმოადგენს პოლიტიკურ პატიმარს და მისი საქმე მმართველი გუნდის შიგნით არსებულ ძალაუფლებისთვის ბრძოლას უკავშირდება. ბოკერიას შეფასებით, მიმდინარე პროცესები კიდევ ერთხელ ადასტურებს, რომ ქვეყანაში ძალაუფლება კონცენტრირებულია ერთი პირის გარშემო და გადაწყვეტილებები მიიღება შიდა კლანური ინტერესებიდან გამომდინარე.

ოპოზიციური პარტიის „ლელო – ძლიერი საქართველო“ ლიდერებმა, სალომე სამადაშვილმა და ლევან სამუშიამ, განაცხადეს, რომ ღარიბაშვილის საქმე არ წარმოადგენს კორუფციასთან სისტემური ბრძოლის მაგალითს და არ უკავშირდება კანონის უზენაესობის რეალურ განმტკიცებას. მათი შეფასებით, საზოგადოებისთვის კვლავ გაურკვეველია საქმის სრული მასშტაბი, მოპარული ან ლეგალიზებული თანხების რეალური ოდენობა და პოლიტიკური პასუხისმგებლობის საკითხი იმ ძალის მხრიდან, რომელმაც ბრალდებული უმაღლეს თანამდებობებზე დანიშნა და წარსულში მხარს უჭერდა.