აშშ-ის სურსათისა და მედიკამენტების ადმინისტრაციამ (FDA) მასშტაბური სამეცნიერო შეფასების საფუძველზე ნიკოტინის ბალიშების (პაუჩების) 20 დასახელებას „მოდიფიცირებული რისკის“ (MRTP) სტატუსი მიანიჭა.

FDA-ის მიერ გავრცელებული ინფორმაციით, აღნიშნული პროდუქტები აშშ-ის ბაზარზე 2025 წლის იანვრიდან იყო დაშვებული, თუმცა ახალი გადაწყვეტილება მწარმოებლებს აძლევს უფლებას მარკეტინგულ კომუნიკაციებში ოფიციალურად გამოიყენონ გზავნილი, რომ სიგარეტის ჩანაცვლება ამ პროდუქტებით ამცირებს გარკვეული დაავადებების – მათ შორის კიბოს, გულის დაავადებების, ინსულტის და ქრონიკული რესპირატორული დაავადებების – განვითარების რისკს.

ამასთან, სააგენტო განმარტავს, რომ MRTP სტატუსი ვრცელდება კონკრეტულ პროდუქტებზე და არა ნიკოტინის ბალიშების მთლიან კატეგორიაზე.

FDA-მ გადაწყვეტილების მიღებისას შეაფასა პროდუქტის გავლენა ჯანმრთელობაზე, მომხმარებელთა აღქმა, არასრულწლოვანებთან დაკავშირებული რისკები და საზოგადოებრივი ჯანდაცვა. სააგენტოს დასკვნით, მწარმოებლის მიერ წარდგენილი რისკების შემცირების შესახებ განცხადება მეცნიერულად დასაბუთებულია და მომხმარებლებისთვის გასაგებად აღქმადი.

გადაწყვეტილება ასევე ეფუძნება თამბაქოს პროდუქტების სამეცნიერო საკონსულტაციო კომიტეტის რეკომენდაციებსა და საზოგადოებრივ მოსმენებს.

FDA აღნიშნავს, რომ MRTP სტატუსი მწარმოებლებს ავალდებულებს ბაზრის მუდმივ მონიტორინგს და მომხმარებელთა ქცევის შეფასებას. ლიცენზია 5 წლის ვადით გაიცემა და საჭიროების შემთხვევაში შეიძლება გადაიხედოს ან გაუქმდეს, თუ გამოიკვეთება საზოგადოებრივი ჯანმრთელობისთვის დამატებითი რისკები, მათ შორის არასრულწლოვანთა მოხმარების ზრდა.

სააგენტო კიდევ ერთხელ ხაზს უსვამს, რომ თამბაქოს ნებისმიერი პროდუქტი შეიცავს რისკს და მისი მოხმარების გარეშე დარჩენა ჯანმრთელობისთვის საუკეთესო არჩევანია. აქტიური მწეველებისთვის კი რეკომენდაციად რჩება ნიკოტინის სრულად შეწყვეტა.

FDA აცხადებს, რომ ავტორიზაციას თან ახლავს მკაცრი მონიტორინგის რეჟიმი, რომელიც მოიცავს პროდუქტის კომერციალიზაციის, ზრდასრულ მომხმარებლებთან კომუნიკაციისა და არასრულწლოვანთა დაცვის კონტროლს.