რუსეთის თავდაცვის ძალებმა ლენინგრადის ოლქში, მოსკოვის ჩრდილო-დასავლეთით, ღამის განმავლობაში ათეულობით უკრაინული დრონი ჩამოაგდეს. საინფორმაციო წყაროები სხვადასხვა ციფრებს ასახელებენ.  აღსანიშნავია, რომ იერიში ემთხვევა სანქტ-პეტერბურგში დაგეგმილ მასშტაბურ ყოველწლიურ ეკონომიკურ ფორუმს, რომელსაც ხშირად პრეზიდენტ ვლადიმერ პუტინის „რუსულ დავოსს“ უწოდებენ. ლენინგრადის ოლქი რუსეთისთვის ენერგეტიკული ექსპორტის უმნიშვნელოვანეს ინფრასტრუქტურასა და მსხვილ ნავთობგადამამუშავებელ ქარხნებს აერთიანებს.

საინვესტიციო ფორუმი, რომელიც 2022 წელს უკრაინაში რუსეთის ჯარების შეჭრის შემდეგ უკვე მეხუთედ ტარდება, კიევზე რუსეთის მიერ განხორციელებული მომაკვდინებელი სარაკეტო და დრონების თავდასხმიდან რამდენიმე საათში იხსნება. მოსკოვის მტკიცებით, კიევზე იერიში საპასუხო ნაბიჯი იყო კრემლის მიერ კონტროლირებად ლუგანსკში მდებარე საერთო საცხოვრებელზე უკრაინელთა თავდასხმისა.

ოფიციალური განრიგის მიხედვით, ვლადიმერ პუტინი ფორუმზე სიტყვით პარასკევს წარდგება. სესიას ასევე დაესწრებიან უზბეკეთისა და ტანზანიის პრეზიდენტები, ჩინეთის ვიცე-პრეზიდენტი და საუდის არაბეთის ენერგეტიკის მინისტრი. სტუმრებს შორის ელიან ცნობილ ამერიკელ მემარჯვენე ინფლუენსერს, მოქმედ ამერიკელ ჩინოვნიკსა და გერმანელ მილიარდერ რითეილერს.

სანქტ-პეტერბურგის პულკოვოს აეროპორტში ფრენები დროებით შეიზღუდა. რუსეთის საავიაციო უწყების („როსავიაცია“) ცნობით, 30-ზე მეტი რეისი გადაიდო ან გაუქმდა. ქალაქის გუბერნატორმა, ალექსანდრ ბეგლოვმა სააგენტო RIA-სთან განაცხადა, რომ ღონისძიების წინ უსაფრთხოების ყოვლისმომცველი ზომებია მიღებული და სამართალდამცველები სრულ მზადყოფნაში არიან.

უკრაინამ ბოლო პერიოდში გააძლიერა თავდასხმები რუსეთის ენერგეტიკულ ინფრასტრუქტურაზე, რათა მოსკოვს შემოსავლების წყარო შეუზღუდოს. სამშაბათს დრონებმა რუსეთის სამხრეთში მდებარე ილსკის ნავთობგადამამუშავებელ ქარხანას დაარტყეს. მოსკოვის მერის, სერგეი სობიანინის განცხადებით, დედაქალაქის მიმართულებით მიმავალი სულ მცირე 20 დრონი იქნა ჩამოგდებული, ხოლო ტამბოვის ოლქში, ქალაქ მიჩურინსკში, სამრეწველო ობიექტი დაზიანდა.

პარალელურად, ევროკავშირისა და ნატოს წევრმა ლატვიამ ოთხშაბათს დილით, რუსეთის საზღვართან ახლოს, ალუკსნეს მუნიციპალიტეტში, საჰაერო სივრცის დარღვევის საფრთხის გამო განგაში გამოაცხადა, თუმცა მოგვიანებით გაფრთხილება გააუქმა.

გარდა ამისა, რუსეთის მიერ კონტროლირებად დონეცკის ოლქში, უკრაინული დრონის თავდასხმის შედეგად 7 ადამიანი დაიღუპა და 11 დაშავდა. კრემლის მიერ დანიშნულმა რეგიონის ხელმძღვანელმა, დენის პუშილინმა განაცხადა, რომ დრონი სამგზავრო ავტობუსს მოხვდა, რომელიც მოსკოვსა და ანექსირებულ ყირიმს შორის (სიმფეროპოლი) გადაადგილდებოდა.