საქართველოს პროკურატურა იუსტიციის სამინისტროს სპეციალური პენიტენციური სამსახურის გენერალური დირექტორის, გიორგი პატარიძისთვის უფლებამოსილების შეჩერების რეკომენდაციით მიმართავს. უწყების ინფორმაციით, დავით ფეიქრიშვილთან დაკავშირებულ სისხლის სამართლის საქმეზე გამოძიება ინტენსიურ რეჟიმში მიმდინარეობს.

პროკურატურის განმარტებით, საქმე იუსტიციის სამინისტროს გენერალური ინსპექციიდან გამოსაძიებლად გენერალური პროკურატურის საგამოძიებო ნაწილს გადაეცა. უწყებაში აცხადებენ, რომ საქმეზე ყველა აუცილებელი საგამოძიებო და საპროცესო მოქმედება ტარდება.

გიორგი პატარიძისთვის უფლებამოსილების შეჩერების საკითხს დავით ფეიქრიშვილის დედა, ნინო აბრამიშვილი, არასაკმარის ზომად მიიჩნევს. მისი განცხადებით, გამოძიება უნდა შეეხოს სხვა პირებსაც, მათ შორის სპეციალური პენიტენციური სამსახურისა და კონკრეტული დაწესებულებების ხელმძღვანელებს.

აბრამიშვილის თქმით, მისი შვილის ჯანმრთელობის მდგომარეობა გაუმჯობესებულია, თუმცა მას ტვინის შერყევა და ხერხემლის დაზიანებები აქვს და წოლითი რეჟიმი ესაჭიროება.

„სახელმწიფომ ჩაიდინა დანაშაული! ამიტომ ყველაფერი ძალიან გამჭვირვალე უნდა იყოს“, – განაცხადა ნინო აბრამიშვილმა „ინტერპრესნიუსთან“. მისი თქმით, აუცილებელია შესაძლო დანაშაულში მონაწილე ყველა პირის პასუხისმგებლობის საკითხის შესწავლა. აბრამიშვილი ასევე მოითხოვს სათვალთვალო კამერების ჩანაწერების შემოწმებას და გამოძიების მიმდინარეობის შესახებ საზოგადოების ინფორმირებას.

პენიტენციურ დაწესებულებებში სავარაუდო არასათანადო მოპყრობის გამო პასუხისმგებელი პირების დასჯას მოითხოვს მსჯავრდებულ გიორგი დავითაძის დედაც, ირმა დავითაძე. მისი განცხადებით, გიორგი პატარიძის მიმართ შესაძლო სამართლებრივი ზომების მიღებას ელოდა და მოითხოვს, რომ პასუხისმგებლობა დაეკისროთ იმ პირებსაც, რომლებიც, მისი თქმით, მის შვილებზე არასათანადო მოპყრობაში მონაწილეობდნენ.

ირმა დავითაძემ განსაკუთრებული ყურადღება გაამახვილა რუსთავის №6 პენიტენციური დაწესებულების დირექტორ შოთა ტრაპაიძეზეც და მასთან დაკავშირებული შესაძლო დარღვევების გამოძიება მოითხოვა.

დავით და გიორგი ფეიქრიშვილების ოჯახის წევრები აცხადებენ, რომ საქმეზე ყველა შესაძლო მონაწილე უნდა გამოიკვეთოს და მათი პასუხისმგებლობის საკითხი სათანადოდ შეფასდეს.