კორუფციულ დანაშაულში ბრალდებული ყოფილი პრემიერ-მინისტრის, ირაკლი ღარიბაშვილის  სასამართლო პროცესი დაიხურა. ამიერიდან, ყოფილი პრემიერის სასამართლო პროცესები დახურულ რეჟიმში წარიმართება. შესაბამისი შუამდგომლობა სასამართლოში ბრალდების მხარემ დააყენა, რაც მოსამართლე თამარ მჭედლიშვილმა დააკმაყოფილა.  პროკურორ ანი ლეკიაშვილის შუამდგომლობის მიხედვით, საქმე თავდაცვის სამინისტროსთანაა დაკავშირებული, სხდომაზე კი, მოქმედი და ყოფილი თანამდებობის პირები დაიკითხებიან, სადაც შესაძლოა, პროფესიული და სახელმწიფო მნიშვნელობის საიდუმლოებები გაჟღერდეს. ასევე, პროკურორის თქმით, შუამდგომლობის საფუძველი, პირთა პერსონალური ინფორმაციის დაცვაცაა.   აღნიშნულ შუამდგომლობას კატეგორიულად არ დაეთანხმა დაცვის მხარე. როგორც ადვოკატმა სოსო ბარათაშვილმა განაცხადა,   ჯუანშერ ბურჭულაძის  საქმეც თავდაცვის სამინისტროს და საიდუმლო შესყიდვებს ეხებოდა, თუმცა ის არ დახურულა.

ადვოკატის თქმით, იმისათვის, რომ საზოგადოებამ სიმართლე გაიგოს, სხდომა არ უნდა დაიხუროს.

ადვოკატების   განცხადებით,  “ქვეყნის მოსახლეობა იმსახურებს, იცოდეს, თუ როგორი ბრალი აქვს  ირაკლი ღარიბაშვილის   და რა მტკიცებულებები აქვთ მის წინააღმდეგ”.  სხდომის დახურვის წინააღმდეგი იყო თავად  ირაკლი ღარიბაშვილიც.   “რა თქმა უნდა, ამ შუამდგომლობას ვეწინააღმდეგები. მინდა საზოგადოებამ გაიგოს სიმართლე, რომ ეს არის ცილისწამებაზე აგებული, პოლიტიკურად მოტივირებული საქმე, აქედან გამომდინარე, რა თქმა უნდა, დიდი მნიშვნელობა აქვს, რომ პროცესი საჯაროდ და გამჭვირვალედ ჩატარდეს, რათა მთელმა საზოგადოებამ დაინახოს ამ ბრალდების უსაფუძვლობა, კატეგორიულად ვეწინააღმდეგები ამ შუამდგომლობას და მოგმართავთ თხოვნით, ეს შუამდგომლობა არ დაკმაყოფილდეს”, – განაცხადა  ირაკლი ღარიბაშვილმა.    ყოფილი პრემიერ-მინისტრის,   განცხადებით, ის წარდგენილ ბრალდებაში თავს დამნაშავედ არ ცნობს. შესაბამისი განცხადება, მან სასამართლო სხდომაზე, მოსამართლის კითხვის პასუხად გააკეთა.  “ცნობთ თუ არა წარდგენილ ბრალდებაში თავს დამნაშავედ?” – მიმართა მას  მოსამართლემ, რაზეც ღარიბაშვილმა უარყოფითი პასუხი გასცა და უპასუხა: “არა”.

ცნობისთვის, პროკურატურამ  ირაკლი ღარიბაშვილის ბრალდება საქართველოს სსკ-ის 338-ე მუხლის მეორე ნაწილის “ა“, “გ“ ქვეპუნქტებითა და მესამე ნაწილის ,,ე“ ქვეპუნქტით წარუდგინა, რაც გულისხმობს სახელმწიფო-პოლიტიკური თანამდებობის მქონე პირის მიერ, ჯგუფურად განსაკუთრებით დიდი ოდენობით ქრთამის აღებას და სასჯელის სახით 11-დან 15 წლამდე თავისუფლების აღკვეთას ითვალისწინებს.

 ირაკლი ღარიბაშვილი  მსჯავრდებულია განსაკუთრებით დიდი ოდენობით უკანონო შემოსავლის ლეგალიზაციაში. მას საპროცესო შეთანხმების საფუძველზე 5 წლით თავისუფლების აღკვეთა მიესაჯა და 1 მილიონი ლარი ჯარიმა დაეკისრა.