იტალიის პროკურატურამ Amazon-ის ევროპულ შვილობილ კომპანიასა და მის ორ ხელმძღვანელს შეატყობინა, რომ მათ შესაძლოა სასამართლოს წინაშე წარდგომა მოუწიოთ.

Reuters-ის ინფორმაციით, საქმე ჩინეთიდან იმპორტირებული პროდუქციის რეალიზაციისას დამატებული ღირებულების გადასახადისა და საბაჟო მოსაკრებლების შესაძლო გადაუხდელობას ეხება.

მილანის პროკურატურის გამოძიების თანახმად, Amazon-ის სავაჭრო და ლოგისტიკური სისტემის მეშვეობით იტალიაში მილიონ-ნახევარზე მეტი პროდუქტი შევიდა ევროკავშირის არაწევრი ქვეყნებიდან, სავარაუდოდ, საბაჟო მოთხოვნების სათანადო შესრულების გარეშე.

გამოძიების ფარგლებში გადაუხდელი იმპორტის დღგ-ის სავარაუდო მოცულობა 3 მილიონ 520 ათას ევროს აღემატება. დამატებითი საბაჟო გადასახადების ოდენობა ჯერ დგინდება.

საქმეში სულ 70 ეჭვმიტანილი ფიგურირებს, მათ შორის ონლაინმოვაჭრეები.

Amazon ბრალდებებს უარყოფს და აცხადებს, რომ საკუთარ პოზიციას სამართლებრივი გზით დაიცავს.